कोका-कोला आणि मेन्टॉसच्या ट्रकजवळ झालेल्या स्फोटात एक माणूस हवेत उडाल्याचा व्हिडीओ सध्या सोशल मीडियावर व्हायरल होत आहे. हा व्हिडीओ खरा आहे की खोटा, असा प्रश्न नेटकऱ्यांना पडला आहे.
कोका-कोलाचा ट्रक, मेन्टॉसचा ट्रक आणि त्यानंतर झालेल्या स्फोटात हवेत उडणारा माणूस, असा एक अजब व्हिडीओ सध्या इंटरनेटवर व्हायरल झाला आहे. हा व्हिडीओ पाहून लोक थक्क झाले असून, हे खरंच घडलंय का, असा प्रश्न त्यांना पडला आहे. व्हिडीओच्या सुरुवातीला कोका-कोलाच्या ट्रकमधून रस्त्यावर मोठ्या प्रमाणात कोल्ड्रिंक सांडताना दिसतं. जवळच मेन्टॉसचा एक ट्रक उभा असतो. एक माणूस मोठी बरणी घेऊन येतो आणि सांडलेला कोका-कोला गोळा करू लागतो.
त्यानंतर हा माणूस मेन्टॉसचा ट्रक उघडतो आणि त्यातून कँडीचे बॉक्स बाहेर काढतो. हे मेन्टॉस सांडलेल्या कोका-कोलाच्या संपर्कात येताच, तिथे धूर आणि फेसाचा मोठा स्फोट होतो.
या स्फोटाचा वेग इतका भयंकर असतो की तो माणूस थेट हवेत उडतो. रस्त्यावर घडलेला हा प्रकार म्हणजे कोका-कोला आणि मेन्टॉसचा एखादा फसलेला प्रयोग असल्यासारखा वाटतो.
पण सोशल मीडिया युजर्सनी या व्हिडीओमागचं सत्य लगेच शोधून काढलं. व्हिडीओमध्ये दिसणाऱ्या बॉक्सवर 'Mentos' ऐवजी 'mentes' असं स्पेलिंग लिहिलं आहे. या चुकीवरूनच हा व्हिडीओ AI ने बनवला असल्याचं उघड झालं.
हा मूळ व्हिडीओ 'TechHalla' ने तयार केला आहे. यासाठी त्यांनी 'GPT Image 2.5' वापरून फोटो तयार केले आणि 'Seedance 2.5' च्या मदतीने त्याला ॲनिमेट केलं. हा हुबेहूब खऱ्यासारखा वाटणारा व्हिडीओ कसा बनवला, याची संपूर्ण माहितीही या क्रिएटरने शेअर केली आहे.
