- Home
- World
- Top 10 Countries With Most Billionaires : जगात सर्वाधिक अब्जाधीश असणारे टॉप 10 देश, भारताचा नंबर कितवा?
Top 10 Countries With Most Billionaires : जगात सर्वाधिक अब्जाधीश असणारे टॉप 10 देश, भारताचा नंबर कितवा?
फोर्ब्सच्या २०२६ च्या यादीनुसार जगात सर्वाधिक अब्जाधीश अमेरिकेत आहेत. या श्रीमंतांच्या यादीत भारताचा क्रमांक कितवा आहे? जाणून घ्या टॉप १० देशांची संपूर्ण माहिती.
जगात सर्वाधिक अब्जाधीश असणारे टॉप १० देश, भारताने रचला विक्रम
जगात सर्वाधिक अब्जाधीश असणाऱ्या देशांची नवी यादी जाहीर झाली आहे. या ग्लोबल रिच लिस्टमध्ये अमेरिकेने आपले वर्चस्व कायम राखले आहे. तर भारतानेही या यादीत मोठी झेप घेतली आहे. सर्वाधिक अब्जाधीश असणारा भारत आता जगातील तिसरा सर्वात मोठा देश बनला आहे.
विविध देशांच्या अर्थव्यवस्थेतील वाढ, शेअर बाजारातील तेजी आणि नव्या बिझनेस मॉडेल्समुळे यावर्षी अब्जाधीशांच्या संख्येत मोठी वाढ झाली आहे. जगात सर्वाधिक श्रीमंत लोक असणारे टॉप १० देश कोणते, त्यांच्याकडे किती संपत्ती आहे आणि त्या देशांतील सर्वात श्रीमंत व्यक्ती कोण आहेत, हे आपण पाहूया.
१. अमेरिका
अमेरिका ९८९ अब्जाधीशांसह जगात पहिल्या स्थानावर आहे. या सर्व श्रीमंतांची एकूण संपत्ती तब्बल ८.४ ट्रिलियन डॉलर्स इतकी आहे. दक्षिण आफ्रिकेतून अमेरिकेत स्थलांतरित झालेले इलॉन मस्क हे अमेरिकेतील अब्जाधीशांच्या यादीत पहिल्या स्थानावर आहेत. ते सध्या जगातील सर्वात श्रीमंत व्यक्ती आहेत.
२. चीन
यावर्षी चीनमधील अब्जाधीशांच्या संख्येत विक्रमी वाढ झाली आहे. एकूण ५३९ अब्जाधीशांसह चीन जगात दुसऱ्या स्थानावर आहे. या सर्वांची एकूण संपत्ती २.२ ट्रिलियन डॉलर्स आहे. गेल्या वर्षी चीनमध्ये ४९५ अब्जाधीश होते, तो विक्रम त्यांनी यंदा मोडला आहे. टिकटॉकची मूळ कंपनी बाईटडान्सचे सह-संस्थापक झांग यिमिंग हे चीनमधील सर्वात श्रीमंत व्यक्ती ठरले आहेत.
३. भारत
सर्वाधिक अब्जाधीश असणाऱ्या देशांच्या यादीत भारताने तिसरे स्थान पटकावले आहे. सध्या आपल्या देशात एकूण २२९ अब्जाधीश आहेत. या सर्वांची एकूण संपत्ती १ ट्रिलियन डॉलर्सवर पोहोचली आहे. रिलायन्स इंडस्ट्रीजचे अध्यक्ष मुकेश अंबानी आणि अदानी समूहाचे अध्यक्ष गौतम अदानी यांच्यात भारतातील सर्वात श्रीमंत व्यक्ती बनण्यासाठी मोठी चुरस पाहायला मिळत आहे.
४. जर्मनी
जर्मनीमध्ये अब्जाधीशांच्या संख्येत लक्षणीय वाढ झाली असून ती २१२ वर पोहोचली आहे. गेल्या वर्षी तिथे १७१ अब्जाधीश होते आणि त्यांची संपत्ती ७९३ अब्ज डॉलर्स होती. यंदा मात्र त्यांची एकूण संपत्ती तब्बल १ ट्रिलियन डॉलर्सवर गेली आहे. ६७.२ अब्ज डॉलर्सच्या संपत्तीसह डायटर श्वार्झ हे जर्मनीतील सर्वात श्रीमंत व्यक्ती ठरले आहेत.
५. रशिया
फोर्ब्सच्या सर्वाधिक अब्जाधीश असणाऱ्या देशांच्या यादीत रशिया पाचव्या स्थानावर आहे. तिथे एकूण १४७ अब्जाधीश असून त्यांची एकूण संपत्ती ६४९ अब्ज डॉलर्स आहे. गेल्या वर्षी रशियात १४० अब्जाधीश आणि ५८० अब्ज डॉलर्सची संपत्ती होती. ३७ अब्ज डॉलर्सच्या संपत्तीसह अलेक्सी मोर्दाशोव्ह आणि त्यांचे कुटुंब रशियात पहिल्या स्थानावर आहे.
६ ते १० क्रमांकावर असणारे देश
• इटली: ८९ अब्जाधीशांसह इटली ६ व्या स्थानावर आहे. त्यांची एकूण संपत्ती ४८३ अब्ज डॉलर्स आहे. ८९.३ अब्ज डॉलर्सच्या संपत्तीसह जियानकार्लो देवासिनी इटलीतील सर्वात श्रीमंत व्यक्ती आहेत.
• कॅनडा: ८२ अब्जाधीशांसह कॅनडा ७ व्या स्थानावर आहे. त्यांची एकूण संपत्ती ४५७ अब्ज डॉलर्स आहे. गेल्या वर्षी तिथे ७६ अब्जाधीश आणि ३४९ अब्ज डॉलर्सची संपत्ती होती. ११० अब्ज डॉलर्ससह चांगपेंग झाओ कॅनडामधील सर्वात श्रीमंत व्यक्ती आहेत.
• हाँगकाँग: ७१ अब्जाधीशांसह हाँगकाँग ८ व्या स्थानावर आहे. त्यांची एकूण संपत्ती ४२० अब्ज डॉलर्स आहे.
• ब्राझील: ७० अब्जाधीशांसह ब्राझीलने ९ वे स्थान मिळवले आहे. त्यांची एकूण संपत्ती २६५ अब्ज डॉलर्स आहे. ३५.९ अब्ज डॉलर्ससह एडुआर्डो सॅव्हरिन ब्राझीलचे सर्वात श्रीमंत व्यक्ती ठरले आहेत.
• तैवान: ६६ अब्जाधीशांसह तैवान १० व्या स्थानावर आहे. त्यांची एकूण संपत्ती २४५ अब्ज डॉलर्स आहे.
