Afghanistan Pakistan Conflict : अफगाणी सैन्याने पाकिस्तानचे 18 सैनिक ठार मारले!
Afghanistan Pakistan Conflict : ड्युरंड लाईन हा अफगाणिस्तान आणि पाकिस्तानमधील एक महत्त्वाचा मार्ग आहे. लष्करी फायदा आणि नियंत्रणासाठी दोन्ही देशांचे सैन्य अनेकदा एकमेकांशी लढतात. काल रात्री उडालेल्या धुमश्चक्रीत १८ पाकिस्तानी जवान ठार झाले.
तालिबानने पाकिस्तानचे १८ सैनिक ठार केले!
काल रात्री पाकिस्तान आणि अफगाणिस्तानमधील ड्युरंड लाईन परिसरात भीषण सीमा संघर्ष झाला. यात अफगाणी तालिबानने पाकिस्तानी लष्करी चौक्यांवर हल्ला करून १८ सैनिकांना ठार केले. अनेक सैनिकांनी आत्मसमर्पण केले.
हेलमंद प्रांताचे सरकारी प्रवक्ते मौलवी मोहम्मद कासिम रियाझ यांनी याला दुजोरा दिला. रियाझ यांनी सांगितले की, या कारवाईत अफगाण सैन्याने पाकिस्तानच्या तीन लष्करी चौक्या ताब्यात घेतल्या आहेत. तसेच, अफगाण सैन्याने पाकिस्तानची मोठ्या प्रमाणात शस्त्रे आणि दारूगोळा जप्त केला आहे, असेही ते म्हणाले.
अफगाणिस्तानच्या संरक्षण मंत्रालयाच्या म्हणण्यानुसार, तालिबान सैन्याने नांगरहार, कुनार, खोस्त, पक्तिया, पक्तिका आणि हेलमंद प्रांतातील पाकिस्तानी चौक्यांवर हल्ले केले. यात १८ पाकिस्तानी सैनिक मारले गेले. या हल्ल्यात अफगाणिस्तानचा एकही सैनिक जखमी झाला नाही, असे तालिबानने म्हटले आहे.
१८९३ मध्ये तयार झालेली ड्युरंड लाईन
पाकिस्तानच्या लष्कराने तोफा, लढाऊ विमाने आणि अवजड शस्त्रास्त्रांनी चौक्यांवर हल्ला करून अफगाणिस्तानला प्रत्युत्तर दिले. पाकिस्तानने अफगाणिस्तानवर तहरीक-ए-तालिबान पाकिस्तान (TTP) च्या दहशतवाद्यांना आश्रय दिल्याचा आरोप केला आहे.
अफगाणिस्तानने पाकिस्तानवर काबूल आणि पक्तिका प्रांतात हवाई हल्ले केल्याचा आरोप केला आहे. त्याचवेळी, पाकिस्तानने अफगाणिस्तानवर तहरीक-ए-तालिबान पाकिस्तानच्या लढवय्यांना आश्रय दिल्याचा आरोप केला आहे. दोन्ही देश एकमेकांवर आरोप-प्रत्यारोप करत आहेत. कतार, इराण आणि सौदी अरेबियासारख्या देशांनी दोन्ही बाजूंना संयम बाळगून राजनैतिक तोडगा काढण्याचे आवाहन केले आहे.
ड्युरंड लाईन परिसरात झालेला हा संघर्ष पाकिस्तान आणि अफगाणिस्तानमधील दीर्घकाळ चाललेल्या आणि गुंतागुंतीच्या सीमावादाचा एक भाग आहे. ड्युरंड लाईन १८९३ मध्ये ब्रिटिश भारत आणि अफगाणिस्तान यांच्यात तयार करण्यात आली होती.
या रेषेमुळे अफगाण आणि पश्तून जमाती दोन भागांमध्ये विभागल्या गेल्या, काही पाकिस्तानात तर काही अफगाणिस्तानात. अफगाणिस्तानने या रेषेला कधीही अधिकृत सीमा म्हणून स्वीकारले नाही. त्यामुळे सीमेवर अनेकदा लष्करी आणि राजकीय तणाव असतो.
सीमा भागातील स्थिरतेवर परिणाम!
तालिबान आणि तहरीक-ए-तालिबान पाकिस्तान (TTP) सारख्या दहशतवादी संघटना अफगाणिस्तानच्या काही भागांमधून कार्यरत आहेत आणि पाकिस्तानात हल्ले करतात. याचा सामना करण्यासाठी पाकिस्तान सीमा सुरक्षा मजबूत करत आहे. तसेच वेळोवेळी अफगाणिस्तानच्या सीमेत लष्करी कारवाई करत आहे.
याला प्रत्युत्तर म्हणून, अफगाण सैन्य कधीकधी पाकिस्तानी चौक्यांवर हल्ले करते.
ड्युरंड लाईन हा अफगाणिस्तान आणि पाकिस्तानमधील एक महत्त्वाचा मार्ग आहे. लष्करी फायदा आणि नियंत्रणासाठी दोन्ही देशांचे सैन्य अनेकदा एकमेकांशी लढतात. सीमेवर राहणाऱ्या पश्तून आणि आफ्रिदी जमाती दोन्ही देशांमध्ये पसरलेल्या आहेत.
स्थानिक संघर्ष, जमिनीचे वाद आणि कौटुंबिक भांडणे कधीकधी मोठ्या संघर्षात बदलतात. ड्युरंड लाईन नेहमीच वादग्रस्त राहिली आहे. अफगाण आणि पाकिस्तानी सैन्यात सीमा संघर्ष सतत होत असतो. या संघर्षांमुळे सीमावर्ती भागातील सुरक्षा आणि स्थिरतेवर परिणाम होतो.
