४० वर्षीय महिलेचा समुद्रकिनाऱ्यावर मगरीच्या हल्ल्यात मृत्यू

पाया धुण्यासाठी समुद्रात उतरलेल्या चाळीस वर्षीय महिलेचा मगरीच्या हल्ल्यात दुर्दैवी मृत्यू झाला. ही घटना इंडोनेशियातील साउथ नियास रिजनसीतील पुलौ-पुलौ बट्टू जिल्ह्यातील दिया ओराहिली समुद्रकिनाऱ्यावर १७ डिसेंबर रोजी घडली. इतर लोक किनाऱ्यावरून पाहत असताना ही महिला पाय धुण्यासाठी समुद्रात उतरली. यावेळी अचानक समुद्रातून एक मगर वर आली आणि तिच्या पायाला चावा घेऊन तिला समुद्रात ओढून नेली, असे प्रत्यक्षदर्शींनी सांगितले.

मगर नुरहावतीच्या पायाला चावा घेऊन ओढत असल्याचे पाहून लोकांनी आरडाओरड केली, पण मगरने तिचा पाय सोडला नाही. काही क्षणातच नुरहावतीला घेऊन मगर समुद्राच्या तळाशी गेली. काही वेळाने मगर पुन्हा समुद्रातून वर आली तेव्हा लोकांनी कोंबडीचे तुकडे टाकून तिचे लक्ष विचलित केले. त्यानंतर मगरने नुरहावतीला सोडून कोंबडीचे तुकडे शोधायला सुरुवात केली. यावेळी लोकांनी नुरहावतीचा मृतदेह किनाऱ्यावर आणला, असे वृत्तात म्हटले आहे.

नरकातील दृश्यांसारखे होते ते, काही क्षणात परिसर रक्ताने माखला गेला, असे घटनेचे प्रत्यक्षदर्शी ऑगस्टसने द मेट्रोशी बोलताना सांगितले. घटनेनंतर पोलिस आणि इतर अधिकारी घटनास्थळी पोहोचले आणि मगरीला गोळ्या घालून मारले, असे वृत्तात म्हटले आहे. अलिकडच्या काळात इंडोनेशियन किनाऱ्यांवर मगरीचे हल्ले वाढले आहेत.

गेल्या दशकात इंडोनेशियात अनेक मगरीचे हल्ले झाल्याचे वृत्त आहे. या काळात ४०० हून अधिक लोक मगरीच्या हल्ल्यात मारले गेले आहेत. हवामान बदलामुळे सुमात्रा बेटांपैकी अनेक बेटे बुडण्याच्या धोक्यात आहेत. किनारपट्टीच्या भागात समुद्राच्या लाटांमुळे अनेक घरे मोठ्या खांबांवर समुद्रात उभी आहेत. यामुळे अपघाताचे प्रमाण वाढत असल्याचे स्थानिकांचे म्हणणे आहे.