नवीन कार घ्यायची आहे, पण कधी घ्यावी याबद्दल गोंधळ उडालाय? महिन्याच्या शेवटी, सणासुदीच्या काळात की वर्षाच्या अखेरीस कार घेण्याचे काय फायदे-तोटे आहेत, हे आम्ही तुम्हाला सांगणार आहोत. जेणेकरून तुम्हाला तुमच्या बजेटमध्ये बेस्ट डील मिळवता येईल.
नवीन कार घेण्याचा विचार करताय? मग तुमच्या आवडीचं मॉडेल आणि व्हेरिएंट निवडण्याइतकंच महत्त्वाचं आहे की तुम्ही कार कधी खरेदी करता. कारण सणासुदीच्या काळातल्या ऑफर्स, डीलर्सचे सेल्स टार्गेट, स्टॉक क्लिअरन्स आणि नवीन मॉडेल्सचं लाँचिंग या सगळ्या गोष्टींचा तुमच्या कारच्या फायनल किमतीवर परिणाम होतो. त्यामुळे कार घेणाऱ्यांच्या मनात नेहमी एक प्रश्न असतो - गाडी घेण्यासाठी नक्की योग्य वेळ कोणती? महिन्याचा शेवट, सणासुदीचा काळ की वर्षाचा शेवट?
महिन्याच्या शेवटी; घासाघीस करण्याची चांगली संधी
महिन्याच्या शेवटच्या दिवसांमध्ये कार खरेदी केल्यास तुम्हाला चांगली घासाघीस (bargaining) करण्याची संधी मिळू शकते. कारण प्रत्येक डीलरवर महिन्याचं सेल्स टार्गेट पूर्ण करण्याचं प्रेशर असतं. अशावेळी टार्गेट पूर्ण होण्याच्या जवळ असताना आणखी एक गाडी विकली जावी, यासाठी डीलर्स जास्त डिस्काउंट किंवा फायदे देऊ शकतात. विशेषतः, जर तुम्हाला हवं असलेलं मॉडेल आणि व्हेरिएंट शोरूममध्ये स्टॉकमध्ये असेल, तर तुम्ही आणखी चांगली डील मिळवू शकता. पण एक गोष्ट लक्षात ठेवा, फक्त महिना संपतोय म्हणून मोठी सवलत मिळेलच असं नाही. शिवाय, तुमच्या आवडीचा रंग किंवा व्हेरिएंट उपलब्ध असेलच याची खात्री नसते.
सणासुदीचा काळ; ऑफर्ससोबत जास्त पर्यायही
आपल्याकडे नवरात्री, दसरा, दिवाळी यांसारख्या सणांच्या काळात गाड्यांची मागणी वाढते. ग्राहकांना आकर्षित करण्यासाठी कार कंपन्या आणि डीलर्स वेगवेगळ्या ऑफर्स जाहीर करतात. यामध्ये कॅश डिस्काउंट, जुन्या कारच्या एक्सचेंजवर जास्तीचा बोनस, मोफत अॅक्सेसरीज आणि स्पेशल एडिशन मॉडेल्सचा समावेश असतो. पण मागणी वाढल्यामुळे लोकप्रिय मॉडेल्ससाठी वेटिंग पीरियड वाढण्याची शक्यता असते. तसेच, तुम्हाला हव्या असलेल्या व्हेरिएंटवरच बेस्ट ऑफर मिळेल असंही नाही.
Related Articles
डिसेंबर महिना; जास्तीत जास्त बचतीसाठी योग्य वेळ
जर तुम्हाला जास्तीत जास्त डिस्काउंट हवा असेल, तर वर्षाच्या शेवटी म्हणजेच डिसेंबरमध्ये कार घेणं हा एक चांगला पर्याय ठरू शकतो. कारण या काळात डीलर्स जुना स्टॉक संपवण्यासाठी उत्सुक असतात. त्याचवेळी, कार कंपन्याही आपलं वार्षिक विक्रीचं टार्गेट पूर्ण करण्याचा प्रयत्न करतात. त्यामुळे सध्याच्या मॉडेल्सवर खूप चांगल्या ऑफर्स मिळू शकतात. पण यात एक तोटाही आहे. डिसेंबरमध्ये घेतलेल्या कारचं मॅन्युफॅक्चरिंग वर्ष तेच राहतं. भविष्यात कार विकताना या गोष्टीचा रिसेल व्हॅल्यूवर परिणाम होऊ शकतो.
मग कार घेण्यासाठी नक्की चांगली वेळ कोणती?
जर तुम्हाला जास्तीत जास्त डिस्काउंट हवा असेल, तर डिसेंबरपर्यंत वाट पाहण्याचा विचार करू शकता. चांगल्या ऑफर्ससोबतच जास्त मॉडेल्स आणि व्हेरिएंट्सचे पर्याय हवे असतील, तर सणासुदीचा काळ योग्य ठरू शकतो. पण जर तुम्ही आधीच एखादी विशिष्ट कार आणि व्हेरिएंट निश्चित केलं असेल, तर महिन्याच्या शेवटी घासाघीस करून तुम्ही फायदा मिळवू शकता. शेवटी, फक्त मोठ्या डिस्काउंटवर जाऊ नका, तर तुम्हाला हवं असलेलं व्हेरिएंट, मॅन्युफॅक्चरिंग वर्ष, उपलब्ध स्टॉक आणि डीलरकडून मिळणारे फायदे या सगळ्याचा विचार करूनच अंतिम निर्णय घ्या.
