True Love Psychology: खरं प्रेम करणाऱ्या व्यक्ती करतात 'या' 7 गोष्टी; जाणून घ्या
True Love Psychology: प्रेम म्हटलं की अनेकांना गोड बोलणं आणि मोठी वचनं आठवतात. पण मानसशास्त्रानुसार, खऱ्या प्रेमात गडबड नसते. ते शांत असतं आणि काही कृतींमधून व्यक्त होतं. मग खरं प्रेम करणारे लोक कोणत्या गोष्टी करतात? मानसशास्त्र काय सांगतं?
खऱ्या प्रेमाचं मानसशास्त्र
'माझं तुझ्यावर किती प्रेम आहे माहीत आहे का?' हे वाक्य ऐकायला कितीही गोड वाटलं तरी, मानसशास्त्रज्ञांच्या मते खरं प्रेम शब्दांपेक्षा कृतीत जास्त दिसतं. कारण शब्द परिस्थितीनुसार बदलू शकतात, पण वागणूक आपल्या आतल्या भावना स्पष्टपणे दाखवते. आपल्यावर खरं प्रेम करणारे लोक मोठे संवाद न बोलता, छोट्या-छोट्या कृतींमधून आपलं प्रेम व्यक्त करतात. मानसशास्त्रानुसार, याच कृती त्यांच्या प्रेमाची खोली दर्शवणारे संकेत आहेत.
आपल्या भावना समजून घेणे
मानसशास्त्रानुसार, जे आपल्यावर खरं प्रेम करतात, ते आपलं बोलणं लक्षपूर्वक ऐकतात. ऐकणं म्हणजे फक्त ऐकून सोडून देणं नाही, तर आपल्या भावना समजून घेणं. आपण काही सांगत असताना मध्येच अडवणं किंवा फोनमध्ये डोकं खुपसून बसण्याऐवजी, आपल्या डोळ्यात बघून प्रतिसाद देत ऐकणं हे प्रेमाचं महत्त्वाचं लक्षण आहे, असं तज्ज्ञ सांगतात. आपलं दुःख हलक्यात न घेता, 'तुला असं का वाटलं?' असं विचारणं, हे त्यांचं आपल्यावरील प्रेम दाखवतं.
वाईट काळात सोबत असणे
मानसशास्त्रानुसार, खरं प्रेम आनंदात नाही, तर समस्या आल्यावर दिसून येतं. आपल्यावर खरं प्रेम करणारे लोक आपण कमजोर असताना, मन दुखावलेलं असताना किंवा अपयशी ठरल्यावर आपल्याला सोडून जात नाहीत. 'मी तुझ्यासोबत आहे' ही भावना ते देतात. हे फक्त शब्द नाहीत, तर एक अनुभव आहे. अशा प्रकारचा पाठिंबा आपल्याला सुरक्षिततेची भावना देतो.
आपल्या मर्यादांचा आदर करणे
प्रेमाच्या नावाखाली नियंत्रण ठेवणं, संशय घेणं आणि आपलं स्वातंत्र्य हिरावून घेणं हे खरं प्रेम नाही, असं तज्ज्ञ स्पष्ट करतात. खरं प्रेम करणारे लोक आपल्या मतांचा आणि निर्णयांचा आदर करतात. आपल्याला थोडा वैयक्तिक वेळ हवा असेल, तर ते समजून घेतात. आपली ध्येयं आणि स्वप्नांना कमी न लेखता प्रोत्साहन देतात. हा आदरच निरोगी नात्याचा पाया आहे, असं मानसशास्त्र सांगतं.
छोट्या गोष्टीही लक्षात ठेवणे
मानसशास्त्रानुसार, आपल्याला आवडणारे पदार्थ, भीती वाटणाऱ्या गोष्टी, दुःखी होण्याची कारणं यांसारख्या गोष्टी लक्षात ठेवणं, हे त्यांचं आपल्यावर किती लक्ष आहे हे दाखवतं. आपण त्यांच्यासाठी खास आहोत आणि ते खरोखरच आपल्या आयुष्याचा एक भाग आहेत, हे याच छोट्या कृतींमधून दिसून येतं.
वागण्यात सातत्य असणे
खरं प्रेम करणारे लोक एका दिवशी चांगले आणि दुसऱ्या दिवशी दुर्लक्ष करणारे नसतात. त्यांच्या वागण्यात एकप्रकारचं सातत्य असतं. राग आला तरी त्यांचा आदर कमी होत नाही. चूक झाल्यास ती मान्य करून सुधारण्याचा प्रयत्न करतात. मानसशास्त्रानुसार, हे भावनिक परिपक्वतेचं लक्षण आहे. प्रेम म्हणजे परिपूर्णता नव्हे, तर जबाबदारीने केलेले प्रयत्न, असं मानसशास्त्रज्ञ सांगतात.
आपल्या प्रगतीत खरा रस असणे
आपल्यावर खरं प्रेम करणारे लोक आपल्या यशाकडे मत्सराने नाही, तर आनंदाने पाहतात. आपण अधिक चांगलं बनावं, अशी त्यांची इच्छा असते. गरज पडल्यास ते खरं बोलायला मागेपुढे पाहत नाहीत, पण ते दुखवण्यासाठी नाही, तर आपल्या चांगल्यासाठी असतं. हे तात्पुरतं आकर्षण आणि खोल प्रेम यातील फरक स्पष्टपणे दाखवतं.
निःस्वार्थपणे प्रेम करणे
आपल्यावर खरं प्रेम करणारे लोक प्रेमात स्वार्थ दाखवत नाहीत. 'मी केलं म्हणून तू पण कर' असे हिशोब न ठेवता, सहजपणे केलेल्या कृतीच खऱ्या प्रेमाची ओळख आहेत. मानसशास्त्रज्ञांच्या मते, असं प्रेम आपलं मानसिक आरोग्य सुधारतं, तणाव कमी करतं आणि जीवनावरील विश्वास वाढवतं.
