रॉयल एनफिल्डच्या पहिल्या इलेक्ट्रिक बाईकची (FF C6) सगळेच आतुरतेने वाट पाहत आहेत. आता ही बाईक चेन्नईमध्ये कोणत्याही स्टिकरशिवाय टेस्टिंग करताना दिसली आहे. त्यामुळे आता लवकरच ही बाईक लाँच होणार असल्याचे संकेत मिळत आहेत.
रॉयल एनफिल्डच्या पहिल्या इलेक्ट्रिक मोटरसायकलची वाट पाहणाऱ्यांसाठी एक मोठी बातमी आहे. कंपनीच्या या नव्या बाईकचे टेस्टिंग करतानाचे फोटो अनेकदा समोर आले आहेत. पण आता वाटतंय की प्रतीक्षा लवकरच संपणार आहे, कारण ही इलेक्ट्रिक मोटरसायकल आता उत्पादनाच्या अगदी जवळ पोहोचली आहे. रॉयल एनफिल्डची ही नवी 'फ्लाईंग फ्ली' (FF C6) नुकतीच चेन्नईच्या रस्त्यांवर कोणत्याही स्टिकर किंवा कव्हरशिवाय टेस्टिंग करताना दिसली. यावरून भारतात येणाऱ्या या पहिल्या इलेक्ट्रिक बाईकचं डिझाइन कसं असेल, याचा अगदी स्पष्ट अंदाज आला आहे. सगळ्यात महत्त्वाचं म्हणजे, या नव्या फोटोंमुळे बाईकच्या लाँचची तयारी वेगात सुरू असल्याचं दिसतंय.
FF C6 ही इलेक्ट्रिक क्रूझर बाईक गेल्या वर्षी EICMA मध्ये पहिल्यांदा दाखवण्यात आली होती. ही बाईक CY2026 च्या पहिल्या तिमाहीत लाँच होण्याची शक्यता आहे. भारतात या बाईकचे अनेक प्रोटोटाइप्स टेस्ट झाले आहेत, पण पहिल्यांदाच ही बाईक अशाप्रकारे लोकांमध्ये कोणत्याही कव्हरशिवाय दिसली आहे. हे स्पाय शॉट्स रेवंत नावाच्या एका ऑटोमोटिव्हप्रेमीने शेअर केले आहेत.
नवीन फोटोंवरून हे स्पष्ट झालं आहे की, बाईकचं फायनल मॉडेल हे आधी दाखवलेल्या कॉन्सेप्ट मॉडेलच्या अगदी जवळ जाणारं आहे. या बाईकचं डिझाइन दुसऱ्या महायुद्धाच्या काळातील मूळ 'फ्लाईंग फ्ली' मोटरसायकलवरून प्रेरित आहे. यावरून दिसतंय की, रॉयल एनफिल्ड आपल्या इलेक्ट्रिक प्रवासातही आपला ऐतिहासिक वारसा जपत आहे. या फोटोंमध्ये बाईकचे काही खास डिटेल्स दिसतात, जसं की गोल हेडलाइट, गर्डर फ्रंट फोर्क, कमीत कमी बॉडी पॅनलिंग, मोठे अलॉय व्हील्स, एक वेगळी ओपन फ्रेम आणि उजव्या बाजूला बेल्ट-ड्राइव्ह सिस्टीम. बॅटरी पॅकच्या जागेवर एक खास रिब असलेलं डिझाइन आहे, जे पहिल्यांदा कॉन्सेप्ट मॉडेलमध्ये दिसलं होतं. बाईकचा एकूण लूक हा रेट्रो क्रूझरसारखा, अतिशय आकर्षक आणि साधा ठेवण्यात आला आहे.
Related Articles
विशेष म्हणजे, या नवीन फोटोंमध्ये मोटरसायकलला एक मेन स्टँडसुद्धा दिसतोय, जो आधीच्या टेस्टिंग मॉडेल्समध्ये स्पष्टपणे दिसला नव्हता. यामुळे रोजच्या वापरासाठी, विशेषतः पार्किंग आणि मेंटेनन्ससाठी ही बाईक अधिक सोयीची ठरेल. रायडरची बसण्याची पोझिशन सरळ आणि आरामदायक दिसते, जी एका क्रूझर बाईकला शोभेशी आहे. मागची सीट (पिलियन सीट) मात्र लहान दिसते, जी नंतर काढता येण्याची शक्यता आहे.
रॉयल एनफिल्डने अजून इंजिनबद्दल कोणतीही अधिकृत माहिती दिलेली नाही, पण FF C6 चा परफॉर्मन्स २५०cc ते ३५०cc पेट्रोल मोटरसायकलसारखा असेल अशी अपेक्षा आहे. बॅटरी पॅकची क्षमता सुमारे ४ ते ५ kWh असेल आणि एका चार्जमध्ये १०० ते १५० किलोमीटरची रेंज मिळेल, असा अंदाज आहे. आधीच्या रिपोर्ट्सनुसार, यात लिथियम आयर्न फॉस्फेट (LFP) बॅटरी वापरली जाऊ शकते, जी अधिक सुरक्षित आणि जास्त काळ टिकणारी मानली जाते. कॉन्सेप्ट मॉडेलमध्येही कंपनीने या बॅटरी टेक्नॉलॉजीवर भर दिला होता.
FF C6 मध्ये ब्लूटूथ कनेक्टिव्हिटीसह एक गोल डिजिटल इन्स्ट्रुमेंट कन्सोल मिळण्याची शक्यता आहे. यात टर्न-बाय-टर्न नेव्हिगेशन, कॉल आणि मेसेज अलर्ट, म्युझिक कंट्रोल्स आणि की-लेस इग्निशन सिस्टीम यांसारखी फीचर्स असतील. सध्या ही मोटरसायकल चेन्नईमध्ये शांतपणे टेस्ट केली जात आहे आणि ती आता उत्पादनासाठी पूर्णपणे तयार दिसते. त्यामुळे येत्या काही आठवड्यांत किंवा कदाचित काही दिवसांतच कंपनीकडून लाँचची अधिकृत घोषणा होण्याची दाट शक्यता आहे.
