RBI FD Rules : बँकेत फिक्स डिपॉझिट केलंय का? नियम बदललेत, लगेच वाचा
बँकेत फिक्स डिपॉझिट (FD) करणाऱ्या ग्राहकांसाठी एक महत्त्वाची बातमी आहे. एफडीच्या नियमांमध्ये मोठे बदल झाले आहेत. बँक ग्राहकांनी हे नवीन नियम समजून घेणं खूप गरजेचं आहे.
फिक्स डिपॉझिट (FD)
सुरक्षित गुंतवणूक आणि चांगला परतावा यासाठी अनेकजण बँकेत फिक्स डिपॉझिट (FD) करतात. आता १ ऑक्टोबर २०२६ पासून मोठ्या रकमेच्या एफडीसाठी नवीन नियम लागू झाले आहेत. रिझर्व्ह बँक ऑफ इंडियाच्या (RBI) नव्या नियमांनुसार, व्यावसायिक बँकांमध्ये ३ कोटी रुपये आणि त्याहून अधिक रकमेच्या सिंगल रुपी टर्म डिपॉझिटला 'बल्क डिपॉझिट' (मोठी ठेव) मानले जाईल. या बदलाचा मुख्य उद्देश व्याजदरांमध्ये पारदर्शकता आणणे हा आहे. यासाठी बँकांना आता दररोज सकाळी त्यांच्या वेबसाईटवर बल्क डिपॉझिटचे व्याजदर जाहीर करावे लागतील.
काय आहे नवा नियम?
नव्या नियमानुसार, बँकांना बल्क डिपॉझिटचे व्याजदर सकाळी १० वाजता जाहीर करावे लागतील. वेबसाईट अपडेट करण्यासाठी १० मिनिटांचा वेळ दिला आहे, म्हणजेच जास्तीत जास्त १०:१० पर्यंत व्याजदर दिसणे बंधनकारक आहे. सर्वात महत्त्वाचे म्हणजे, एकाच दिवशी स्वीकारलेल्या समान रकमेच्या बल्क डिपॉझिटवर बँकेच्या सर्व शाखांमध्ये एकच व्याजदर दिला पाहिजे. ग्राहक कोणत्याही शाखेत गेला तरी त्याला समान रकमेसाठी तोच व्याजदर मिळेल, याची खात्री या नियमामुळे झाली आहे.
एकच व्याजदर
बँकांनी सर्वच बल्क डिपॉझिटसाठी एकच व्याजदर द्यावा, असे कोणतेही बंधन नाही. काही विशिष्ट बल्क डिपॉझिट्सवर वेगवेगळे व्याजदर देण्याची मुभा रिझर्व्ह बँकेने दिली आहे. हे नवीन नियम फक्त व्यावसायिक बँकांनाच नाही, तर स्मॉल फायनान्स बँका, प्रादेशिक ग्रामीण बँका, लोकल एरिया बँका, पेमेंट बँका आणि नागरी सहकारी बँकांनाही लागू होणार आहेत.
नियमांचा थेट परिणाम नाही
सामान्य एफडी ग्राहकांनी घाबरून जाण्याचे कारण नाही. ३ कोटी रुपयांपेक्षा कमी रकमेच्या एफडीवर या नव्या नियमांचा थेट परिणाम होणार नाही. उदाहरणार्थ, जर तुमची १ लाख, ५ लाख किंवा २५ लाखांची एफडी असेल, तर तुमच्यासाठी काहीही बदलणार नाही. फक्त ३ कोटी किंवा त्याहून अधिक गुंतवणूक करणाऱ्या ग्राहकांनीच बँकेच्या वेबसाईटवर रोजचे व्याजदर तपासणे गरजेचे आहे.
१ ऑक्टोबरपासून नियम लागू
१ ऑक्टोबरपासून लागू झालेल्या या नियमांचा अर्थ असा नाही की सर्वांचे व्याजदर बदलले आहेत. हा नियम प्रामुख्याने मोठ्या रकमेच्या एफडीचे व्याजदर ठरवण्यासाठी आणि ते पारदर्शकपणे जाहीर करण्यासाठी आहे. तुम्ही ३ कोटी किंवा त्याहून अधिक रकमेची एफडी करणार असाल, तर आधी बँकेच्या अधिकृत वेबसाईटवर त्या दिवसाचा व्याजदर तपासा आणि नोंदवून ठेवा. नंतर एफडी पावतीवर दिलेल्या व्याजदरासोबत तुम्ही त्याची तुलना करू शकता. यामुळे मोठ्या रकमेची गुंतवणूक करताना ग्राहकांना अधिक स्पष्टता मिळेल.
