- Home
- Utility News
- LPG Cylinder: गॅस सिलिंडर बुकिंगच्या नियमात मोठा बदल! आता १५ नव्हे तर इतक्या दिवसांनीच मिळणार दुसरा सिलिंडर; काय आहे कारण?
LPG Cylinder: गॅस सिलिंडर बुकिंगच्या नियमात मोठा बदल! आता १५ नव्हे तर इतक्या दिवसांनीच मिळणार दुसरा सिलिंडर; काय आहे कारण?
आखाती देशांतील युद्धजन्य परिस्थितीमुळे गॅस कंपन्यांनी सिलिंडर बुकिंगचा नियम बदलले. आता ग्राहकांना पहिला सिलिंडर घेतल्यावर दुसरा बुक करण्यासाठी १५ ऐवजी २५ दिवस थांबावे लागणार आहे. या निर्णयामुळे संभाव्य गॅस तुटवडा टाळणे, साठेबाजी रोखणे हा उद्देश आहे.
गॅस सिलिंडर बुकिंगच्या नियमात मोठा बदल!
मुंबई: आखाती देशांतील वाढत्या युद्धजन्य परिस्थितीचा फटका आता थेट भारतीय गृहिणींच्या स्वयंपाकघराला बसू लागला आहे. इस्रायल-अमेरिका आणि इराण यांच्यातील संघर्षामुळे गॅस पुरवठ्यावर परिणाम होण्याची शक्यता लक्षात घेऊन गॅस कंपन्यांनी सिलिंडर बुकिंगच्या कालावधीत वाढ करण्याचा महत्त्वपूर्ण निर्णय घेतला आहे.
१५ दिवसांचा नियम बदलला, आता 'वेटिंग' वाढले!
आतापर्यंत घरगुती गॅस ग्राहकांना पहिला सिलिंडर घेतल्यावर अवघ्या १५ दिवसांच्या अंतराने दुसरा सिलिंडर बुक करण्याची मुभा होती. मात्र, नव्या नियमांनुसार हा कालावधी आता २५ दिवसांवर नेण्यात आला आहे. म्हणजेच, एकदा सिलिंडर घेतल्यावर पुढील २५ दिवस तुम्हाला नवीन बुकिंग करता येणार नाही.
का घेतला हा निर्णय?
युद्धाची झळ: आखाती देशांतून होणाऱ्या कच्च्या तेलाच्या आणि गॅसच्या आयातीवर युद्धाचा परिणाम होत आहे.
पुरवठ्याचे नियोजन: संभाव्य तुटवडा टाळण्यासाठी केंद्र सरकारने गॅस वितरक कंपन्यांना महिन्यातून एकदाच (किंवा २५ दिवसांच्या अंतराने) सिलिंडर पुरवठा करण्याच्या सूचना दिल्या आहेत.
साठेबाजीला लगाम: गॅसचा अनावश्यक साठा होऊ नये, हा देखील यामागील एक मुख्य उद्देश आहे.
नागरिकांमध्ये संभ्रम आणि चिंतेचे वातावरण
सरकारने अधिकृतपणे गॅस तुटवड्याची घोषणा केलेली नसली, तरी या निर्णयामुळे ग्राहकांमध्ये भीतीचे वातावरण आहे. अनेक ठिकाणी जुन्या ऑर्डर्स मिळण्यास विलंब होत असल्याने नागरिक स्वतःहून गॅस एजन्सीबाहेर रांगा लावताना दिसत आहेत. काही ठिकाणी गॅसचा तुटवडा जाणवू लागल्याने हॉटेल व्यावसायिक आणि गृहिणींनी 'बॅकअप' म्हणून पर्यायी व्यवस्था शोधण्यास सुरुवात केली आहे.
महत्त्वाची टीप
ज्या कुटुंबांकडे दोन सिलिंडरचे कनेक्शन आहे, त्यांनी आपला गॅस जपून वापरण्याचे आणि राखीव सिलिंडर तयार ठेवण्याचे आवाहन काही स्तरांतून केले जात आहे.
