Kitchen Tips: चिंच काळी पडू नये म्हणून ही सोपी ट्रिक वापरा, वर्षभर टिकेल फ्रेश!

Kitchen Tips: आपल्या अनेक पदार्थांची चव वाढवणारी चिंच योग्यप्रकारे साठवली नाही, तर ती काळी पडते. पण काही सोप्या टिप्स वापरल्या तर चिंच वर्षभर फ्रेश राहू शकते. कोणत्या आहेत या टिप्स जाणून घ्या.

Image Credit : instagram

चिंच

आपण बाजारातून एकदम चांगली, लालसर रंगाची चिंच आणतो. पण काही दिवसांनी ती काळी पडू लागते. असं होऊ नये आणि चिंच वर्षानुवर्षे ताजी राहावी यासाठी काही सोप्या टिप्स आहेत. चला, त्या काय आहेत ते पाहूया.

Image Credit : Getty

चिंच ताजी ठेवण्याच्या टिप्स

बाजारातून आणलेल्या चिंचेतील धागे आणि बिया काढून टाका. त्यात थोडं मीठ घालून ते चांगलं मळून घ्या. नंतर उन्हात वाळवून डब्यात भरून ठेवा. यामुळे चिंच दगडासारखी कडक होत नाही आणि तिचा रंगही बदलत नाही. दुसरा उपाय म्हणजे, चिंचेतील धागे-बिया काढून ती झिपलॉक बॅगमध्ये ठेवून फ्रीजमध्ये ठेवा. असं केल्यासही चिंच वर्षभर ताजी राहते. तुम्ही चिंचेचा कोळ (पेस्ट) तयार करून काचेच्या बरणीत ठेवू शकता. हा कोळ वर्षभर टिकतो आणि वापरायलाही सोपा असतो. बिया काढलेली चिंच हवाबंद डब्यात फ्रीजमध्ये ठेवल्यासही तिचा रंग बदलत नाही, पण ती थोडी कडक होऊ शकते.

Image Credit : Getty

या गोष्टींची नक्की काळजी घ्या

१. बिया आणि धागे काढा: चिंच साठवण्यापूर्वी त्यातील बिया, धागे आणि टरफलं पूर्णपणे काढून टाका. यामुळे किडे लागत नाहीत. २. उन्हात वाळवा: चिंचेमध्ये थोडाही ओलावा राहिल्यास ती लवकर काळी पडते. म्हणून, साठवण्यापूर्वी एक दिवस कडक उन्हात वाळवा. ३. मीठ वापरा: चिंचेला थोडं खडे मीठ लावून ठेवल्यास तिचा रंग बदलत नाही आणि ती खराब होत नाही. चिंचेचे थर लावून प्रत्येक थरावर मीठ भुरभुरा. ४. योग्य भांडी: चिंच नेहमी प्लास्टिक किंवा काचेच्या बरणीतच ठेवा. स्टील किंवा ॲल्युमिनियमच्या भांड्यात ठेवल्यास भांडी खराब होतात आणि चिंचेचा रंगही बदलतो. ५. ओलावा टाळा: चिंचेची बरणी कोरड्या जागी ठेवा आणि वापरताना ओल्या हातांऐवजी कोरडा चमचा वापरा.