Robotics चीनची मोठी ई-कॉमर्स कंपनी JD.com भविष्यात आपल्या ७ लाख डिलिव्हरी कर्मचाऱ्यांच्या जागी रोबोट्स आणणार आहे, असं कंपनीचे संस्थापक रिचर्ड लियू यांनी म्हटलंय. या कर्मचाऱ्यांच्या नोकऱ्या जाऊ नयेत म्हणून कंपनी त्यांना नवीन टेक्नॉलॉजीचं ट्रेनिंग देणार आहे.
Robotics आर्टिफिशियल इंटेलिजन्स (AI) मुळे नोकऱ्या जातील, ही भीती जगभर पसरली आहे. त्यातच आता रोबोटिक्स टेक्नॉलॉजीही वेगाने पुढे येत आहे. याच दरम्यान, चीनची मोठी ई-कॉमर्स कंपनी JD.com चे संस्थापक आणि चेअरमन रिचर्ड लियू यांनी एक मोठं विधान केलंय, ज्यामुळे मोठी चर्चा सुरू झाली आहे.
Robotics revolution एशिया-पॅसिफिक इकॉनॉमिक को-ऑपरेशन (APEC) च्या सीईओ फोरममध्ये बोलताना लियू म्हणाले की, भविष्यात कंपनीच्या जवळपास ७ लाख डिलिव्हरी कर्मचाऱ्यांची जागा रोबोट्स घेतील. 'एक दिवस असा येईल, जेव्हा सगळी पार्सल्स फक्त रोबोट्सच डिलिव्हर करतील. तेव्हा माणसांची गरज खूप कमी होईल,' असं त्यांनी स्पष्ट केलं.
पण त्याचवेळी त्यांनी कर्मचाऱ्यांच्या नोकरीबद्दल चिंताही व्यक्त केली. 'माझ्या ७ लाख सहकाऱ्यांची नोकरी आणि रोजीरोटी जावी, अशी माझी इच्छा नाही,' असं लियू म्हणाले. यासाठी कंपनीने जवळपास १२० शिक्षण संस्थांसोबत मिळून कर्मचाऱ्यांना नवीन क्षेत्रांमध्ये ट्रेनिंग देण्यास सुरुवात केली आहे, असंही त्यांनी सांगितलं.
Related Articles
रोबोट्सचा वापर वाढल्यामुळे त्यांच्या देखभालीसाठी आणि दुरुस्तीसाठी तज्ज्ञांची गरज वाढेल, असं लियू यांना वाटतं. 'रोबोट्स म्हणजे मशीनच आहेत. त्या कधी ना कधी खराब होणारच. त्यामुळे त्यांची देखभाल करण्यासाठी आणि त्यांना कंट्रोल करण्यासाठी माणसांची गरज लागेलच,' असं ते म्हणाले.
चीनच्या नवीन पंचवार्षिक विकास योजनेतही रोबोटिक्सला महत्त्वाचं स्थान दिलं आहे. सरकारने आर्थिक विकासासाठी रोबोट्सला एक महत्त्वाचं तंत्रज्ञान मानलं आहे. विमानतळांवर जेवण पोहोचवणं आणि रेल्वे नेटवर्कमधून सामान पाठवणं, अशा अनेक रोबोटिक योजनांची चाचणी सध्या सुरू आहे.
इकडे, ॲमेझॉनसारख्या ग्लोबल कंपन्याही ऑटोमेशनचा मोठ्या प्रमाणात वापर करत आहेत. ॲमेझॉनने २०१२ पासून आतापर्यंत १० लाखांपेक्षा जास्त रोबोट्स आपल्या कामात सामील केल्याचं नुकतंच जाहीर केलं. यावरून भविष्यात नोकरीच्या क्षेत्रात रोबोट्सचा प्रभाव आणखी वाढणार असल्याचं दिसतंय.
टेक्नॉलॉजीची प्रगती माणसांचं आयुष्य सुधारण्यासाठी व्हायला हवी, नोकरीच्या संधी पूर्णपणे संपवण्यासाठी नाही, असं रिचर्ड लियू यांनी स्पष्ट केलं. पण एक गोष्ट नक्की आहे की, रोबोटिक्स आणि ऑटोमेशनच्या वाढीमुळे नोकरीच्या बाजारात मोठे बदल होणार आहेत.
