स्मार्ट टीव्हीमधील व्हॉईस असिस्टंट वापरायला सोपा असला तरी, त्याचा मायक्रोफोन तुमच्या प्रायव्हसीसाठी धोकादायक ठरू शकतो. तुमचं बोलणं रेकॉर्ड होऊन सर्व्हरवर पाठवलं जाण्याची शक्यता असते, त्यामुळे गरज नसताना माईक बंद ठेवणंच चांगलं.
स्मार्ट टीव्हीमुळे आपलं टीव्ही बघण्याचं विश्वच बदलून गेलं आहे. आता टीव्हीवर YouTube आणि Netflix सारखे अॅप्स सहज चालतात. विशेषतः व्हॉईस असिस्टंटमुळे तर रिमोटशिवाय अनेक गोष्टी करता येतात. फक्त बोलून कमांड दिली की काम होतं.
स्मार्ट टीव्हीचा माईक: सोय की डोकेदुखी?
सिनेमाचं नाव टाईप करण्याऐवजी फक्त तोंडी सांगितलं की तो लगेच सर्च होतो. कुठलंही अॅप शोधण्यासाठी किंवा इतर कमांड देण्यासाठी व्हॉईस असिस्टंट खूप सोयीस्कर ठरतो. पण या सोयीची एक दुसरी, धोकादायक बाजूही आहे. तुमचा स्मार्ट टीव्हीचा माईक तुमच्या खासगी आयुष्यात डोकावू शकतो.
स्मार्ट टीव्हीचा मायक्रोफोन बॅकग्राउंडला सतत अॅक्टिव्ह असतो, जेणेकरून तो तुमची कमांड ऐकू शकेल. टीव्हीला तुमचं प्रत्येक बोलणं समजत नसलं तरी, कमांड ओळखण्यासाठी त्याचा माईक सतत चालू असतो.
तुमच्या आवाजातील कमांड समजून घेण्यासाठी आणि त्यावर प्रक्रिया करण्यासाठी हा ऑडिओ डेटा कंपनीच्या किंवा थर्ड-पार्टी सर्व्हरवर पाठवला जाऊ शकतो. त्यामुळे तुमचं खासगी बोलणंही रेकॉर्ड होण्याची भीती असते. म्हणूनच, जेव्हा तुम्हाला व्हॉईस असिस्टंटची गरज नसेल, तेव्हा त्याचा मायक्रोफोन बंद करणं हाच तुमची प्रायव्हसी जपण्याचा सर्वात महत्त्वाचा उपाय आहे.
