Home Gardening: फेब्रुवारीत लावा कलिंगडाचा वेल, उन्हाळ्यात अनुभवा थंडावा...
Home Gardening: उन्हाळ्यात आपण बाजारातून गोड आणि रसरशीत कलिंगड विकत आणतोच. पण यंदा तुम्हाला तुमच्या टेरेसवर, बाल्कनीत किंवा छोट्याशा किचन गार्डनमध्ये कलिंगड उगवायचं असेल, तर कुंडीत त्याचा वेल कसा लावायचा हे आम्ही तुम्हाला सांगणार आहोत.
घरी कलिंगडाची लागवड कशी करावी?
कलिंगड लावण्याचा सर्वोत्तम काळ म्हणजे फेब्रुवारी ते एप्रिल. या वेलीच्या वाढीसाठी २२ ते ३५ डिग्री सेल्सियस तापमान उत्तम असतं, यामुळे रोपाची वाढ झपाट्याने होते. तुम्ही बियांपासून किंवा थेट रोपापासूनही याची लागवड करू शकता.
बियांपासून कलिंगड कसे लावावे?
कलिंगडाचा वेल लावण्यासाठी चांगल्या प्रतीच्या हायब्रीड किंवा गावठी कलिंगडाच्या बिया घ्या. लावण्यापूर्वी बिया ६ ते ८ तास पाण्यात भिजवून ठेवा. यामुळे अंकुर लवकर फुटतात. तुम्ही छोट्या रोपापासूनही वेल तयार करू शकता.
कलिंगडाच्या लागवडीसाठी योग्य माती आणि कुंडीची निवड
तुम्ही कुंडीत कलिंगड लावत असाल, तर किमान 15 ते 18 इंच रुंद आणि मोठी कुंडी घ्या. माती हलकी आणि पाण्याचा चांगला निचरा होणारी असावी. यासाठी बागेतील माती, 30% शेणखत आणि 20% वाळू एकत्र करून भुसभुशीत माती तयार करा.
कलिंगडाच्या बिया लावण्याची प्रक्रिया
कुंडीत माती तयार झाल्यावर एक ते दीड इंच खोल खड्डा करा. त्यात दोन ते तीन बिया टाका. वरून हलकी माती टाकून पाणी द्या. 5 ते 7 दिवसांत बियांना अंकुर फुटायला सुरुवात होईल.
वेलीची देखभाल कशी करावी?
कलिंगडाचा वेल पसरतो, त्यामुळे त्याला जास्त जागेची गरज असते. रोज थोडं-थोडं पाणी द्या, पण पाणी साचू देऊ नका. दर 15 दिवसांनी सेंद्रिय खत किंवा वर्मी कंपोस्ट टाका. वेल वाढल्यावर त्याला आधार देण्यासाठी जाळी किंवा दोरीचा वापर नक्की करा.
फळ किती दिवसांत तयार होते?
कलिंगडाच्या वेलीला साधारणपणे 60 ते 75 दिवसांत फुलं आणि मग फळं लागायला लागतात. जेव्हा कलिंगडाचा रंग गडद हिरवा होईल आणि खालच्या बाजूला पिवळा डाग दिसेल, तेव्हा फळ पिकले आहे असं समजा. अशावेळी कलिंगड तोडून घ्या आणि घरच्या घरी ऑरगॅनिक, गोड आणि रसरशीत कलिंगडाचा आनंद घ्या.
