पोटात गॅस आणि डोकेदुखी यांचा काय संबंध आहे? जाणून घ्या माहिती नसलेली गोष्ट
Gastric Headache: डोकेदुखी होण्याची अनेक कारणं असतात. पण पचनाच्या समस्येमुळेही डोकेदुखी होऊ शकते, हे तुम्हाला माहीत आहे का? यालाच गॅस्ट्रिक हेडएक म्हणतात. प्रत्येक डोकेदुखी तणावामुळेच येते असं मानणं चुकीचं आहे. काहीवेळा खरं कारण पोटात दडलेलं असतं.
गॅसमुळे डोकेदुखी का होते?
आपलं पोट आणि मेंदू यांच्यात एक घट्ट नातं आहे. याला 'गट-ब्रेन कनेक्शन' म्हणतात. अपचन, ॲसिडिटी, गॅस जास्त होणं यांसारख्या समस्या उद्भवल्यावर शरीर प्रतिक्रिया देतं. काहींमध्ये हा त्रास डोकेदुखीच्या रूपात दिसून येतो. मसालेदार पदार्थ, वेळेवर न जेवणं, जास्त चहा-कॉफी आणि ताणतणाव या गोष्टींमुळे ही समस्या वाढते.
सामान्य गॅस्ट्रिक डोकेदुखी आणि गॅस्ट्रिक मायग्रेनमधील फरक
बंगळूरमधील बंगळूर गॅस्ट्रो सेंटरच्या रिपोर्टनुसार, गॅस्ट्रिक हेडएक आणि गॅस्ट्रिक मायग्रेन या दोन्ही वेगवेगळ्या गोष्टी आहेत. गॅस्ट्रिक हेडएकमध्ये हलकी किंवा सततची डोकेदुखी असते. सोबतच पोट फुगणे आणि अपचन यांचाही त्रास होतो. गॅस्ट्रिक मायग्रेनमध्ये तीव्र वेदना होतात. प्रकाश आणि आवाजाचा त्रास, बद्धकोष्ठता, उलट्या होऊ शकतात. दोन्हीचं मूळ कारण पचनाच्या समस्या हेच आहे.
धोक्याची सूचना कधी समजावी?
कधीतरी डोकेदुखी झाल्यास फार काळजी करण्याची गरज नाही. पण आठवड्यातून दोनपेक्षा जास्त वेळा डोकेदुखी, कारण नसताना वजन कमी होणे, वारंवार उलट्या, तीव्र पोटदुखी अशी लक्षणं असतील, तर ही केवळ गॅसची समस्या नसू शकते. क्रॉनिक गॅस्ट्रायटिस, पेप्टिक अल्सर, पित्ताशयाचे आजार, इरिटेबल बॉवेल सिंड्रोम (IBS), GERD यांसारख्या समस्यांचे हे लक्षण असू शकते.
डॉक्टरांचा सल्ला कधी घ्यावा?
घरगुती उपायांनी किंवा औषधांनी बरे वाटेल असं समजणं योग्य नाही. वारंवार होणारी डोकेदुखी, घरगुती उपचारांनी आराम न मिळणे, पोटाच्या गंभीर समस्या दिसत असल्यास, त्वरित गॅस्ट्रोएन्टेरोलॉजिस्टला भेटा. गरज भासल्यास, एंडोस्कोपीसारख्या तपासण्यांद्वारे पचनसंस्थेची स्थिती तपासली जाते. उपचारात केवळ वेदनाशामक औषधेच नव्हे, तर पचनसंस्था सुधारणे हे मुख्य उद्दिष्ट असते.
गॅस्ट्रिक डोकेदुखीपासून बचाव कसा करावा?
या समस्येपासून सुटका मिळवण्यासाठी तज्ज्ञ काही सूचना देतात. वेळेवर जेवण करा, कमी मसालेदार आणि हलका आहार घ्या, दिवसभरात पुरेसे पाणी प्या, तणाव नियंत्रणात ठेवा, जास्त चहा आणि कॉफी पिणे टाळा.
टीप: वर दिलेली माहिती केवळ प्राथमिक स्वरूपाची आहे. आरोग्याशी संबंधित कोणत्याही समस्येसाठी डॉक्टरांचा सल्ला घेणेच उत्तम.
