ई-कॉमर्स क्षेत्रातील मोठी कंपनी फ्लिपकार्ट आता फूड डिलिव्हरी व्यवसायात उतरणार आहे. यामुळे झोमॅटो आणि स्विगीसारख्या कंपन्यांना मोठं आव्हान मिळणार आहे.
वॉलमार्टच्या मालकीची ई-कॉमर्स कंपनी फ्लिपकार्ट आता ऑनलाइन फूड डिलिव्हरी क्षेत्रात उतरण्याच्या तयारीत आहे. सध्या या मार्केटवर राज्य करणाऱ्या झोमॅटो आणि स्विगीसाठी हे एक मोठं आव्हान ठरू शकतं. सुरुवातीला ही सेवा छोट्या स्तरावर सुरू केली जाईल. ग्राहकांचा प्रतिसाद कसा आहे हे पाहून आणि त्यात आवश्यक बदल करून नंतर देशभरात ही सेवा वाढवली जाईल.
स्वतंत्र ॲप आणि फ्लिपकार्ट ॲपमधूनही ऑर्डर
ग्राहक एका नवीन स्वतंत्र ॲपद्वारे किंवा थेट फ्लिपकार्टच्या सध्याच्या ॲपमधूनही जेवण ऑर्डर करू शकतील. मात्र, या नव्या सेवेचं नाव काय असेल किंवा ती कोणत्या शहरात पहिल्यांदा सुरू होईल, हे कंपनीने अजून सांगितलेलं नाही. केंद्र सरकारच्या 'ONDC' प्लॅटफॉर्मसोबत मिळून फ्लिपकार्ट ही सेवा सुरू करण्याची शक्यता वर्तवली जात आहे. पण, याच्या बिझनेस मॉडेलबद्दल बोलायला फ्लिपकार्टने नकार दिला आहे.
ग्राहकांना उत्तम सेवा देण्याचं लक्ष्य
इतर कंपन्यांशी स्पर्धा कशी करायची यापेक्षा, ग्राहकांना काहीतरी नवीन आणि चांगलं देता येईल अशाच क्षेत्रात फ्लिपकार्ट प्रवेश करते, असं कंपनीने स्पष्ट केलं आहे. इतर प्लॅटफॉर्मवर उपलब्ध असलेली बहुतेक रेस्टॉरंट्स फ्लिपकार्टवरही ग्राहकांना मिळावीत, यासाठी एक मोठं रेस्टॉरंट नेटवर्क तयार करण्याचं कंपनीचं ध्येय आहे.
Related Articles
स्पर्धा आणखी तीव्र होणार
फ्लिपकार्टच्या या एंट्रीमुळे भारतातील फूड डिलिव्हरी क्षेत्रातली स्पर्धा आणखी वाढणार आहे. सध्या Eternally च्या मालकीची झोमॅटो आणि स्विगी या क्षेत्रातील मुख्य कंपन्या आहेत. आपला मोठा ग्राहकवर्ग, मजबूत डिलिव्हरी नेटवर्क आणि वाढत्या 'क्विक कॉमर्स' व्यवसायाच्या जोरावर या क्षेत्रात आपलं स्थान निर्माण करण्याचा फ्लिपकार्टला विश्वास आहे.
