Escalator vs Travelator : एस्केलेटर आणि ट्रॅव्हलेटरमध्ये नेमका फरक काय?
मॉल, रेल्वे स्टेशन किंवा एअरपोर्टवर तुम्ही एस्केलेटर आणि ट्रॅव्हलेटर नक्कीच पाहिले असतील. हे दोन्ही लोकांचा प्रवास सोपा करतात, पण त्यांचा वापर वेगवेगळ्या कामांसाठी होतो. या दोन्हीमध्ये नेमका काय फरक आहे, हे तुम्हाला माहिती आहे का?
एस्केलेटर म्हणजे काय?
एस्केलेटर म्हणजे एका मजल्यावरून दुसऱ्या मजल्यावर नेणारे सरकते जिने. हे जिने वर किंवा खाली अशा दोन्ही दिशांना जातात. एका इलेक्ट्रिक मोटरच्या मदतीने हे जिने सतत गोल फिरत राहतात. तुम्ही यावर शांत उभे राहू शकता किंवा चालतही जाऊ शकता. बॅलन्स सांभाळण्यासाठी दोन्ही बाजूंना सरकणारे हँडरेल असतात. शॉपिंग मॉल, मेट्रो स्टेशन, रेल्वे स्टेशन आणि मोठ्या इमारतींमध्ये एस्केलेटर हमखास पाहायला मिळतात. जिथे खूप लोकांना एकाच वेळी वर-खाली करायचे असते, तिथे याचा खूप फायदा होतो.
ट्रॅव्हलेटर म्हणजे काय?
ट्रॅव्हलेटरला 'मूव्हिंग वॉकवे' असेही म्हणतात. हा एक सपाट सरकता रस्ता असतो. एस्केलेटरसारख्या यात पायऱ्या नसतात. त्याऐवजी एक सपाट पट्टा सतत पुढे सरकत असतो. तुम्ही यावर उभे राहून किंवा चालतही पुढे जाऊ शकता. काही ट्रॅव्हलेटर पूर्णपणे आडवे असतात, तर काही थोडे तिरपे असतात जेणेकरून लोकांना दुसऱ्या लेव्हलवर जाता येईल. एअरपोर्ट आणि मोठ्या मॉल्समध्ये हे जास्त वापरले जातात. एअरपोर्टवर एका टर्मिनलवरून दुसऱ्या टर्मिनलवर चालत जाण्याचा त्रास वाचवण्यासाठी याचा खूप उपयोग होतो.
एस्केलेटर आणि ट्रॅव्हलेटरमधील मुख्य फरक
हे दोन्ही विजेवर चालत असले तरी त्यांची रचना आणि वापर वेगळा आहे.
डिझाईन: एस्केलेटरला पायऱ्या असतात, तर ट्रॅव्हलेटरला सपाट पट्टा असतो.
मुख्य उद्देश: एस्केलेटर लोकांना एका मजल्यावरून दुसऱ्या मजल्यावर नेतो. ट्रॅव्हलेटर एकाच मजल्यावर लांबचे अंतर कापण्यासाठी वापरतात.
दिशा: एस्केलेटर वर-खाली जातो, तर ट्रॅव्हलेटर बहुधा आडव्या दिशेने पुढे जातो.
सामान नेणे: ट्रॅव्हलेटरवर चाकांची बॅग किंवा ट्रॉली नेणे सोपे आणि सुरक्षित असते. पण एस्केलेटरवर ट्रॉली नेणे धोकादायक ठरू शकते.
वापर: एस्केलेटर मॉल्स आणि स्टेशनवर जास्त दिसतात, तर ट्रॅव्हलेटर एअरपोर्टवर लांबचे अंतर पार करण्यासाठी वापरले जातात.
ट्रॅव्हलेटरची लांबी किती असते?
ट्रॅव्हलेटरची लांबी ही जागा आणि प्रवाशांच्या संख्येवर अवलंबून असते. काही ट्रॅव्हलेटर फक्त काही मीटर लांब असतात, तर एअरपोर्टवर ते १०० मीटरपेक्षाही जास्त लांब असू शकतात.
मोठ्या एअरपोर्टवर प्रवाशांना एका गेटवरून दुसऱ्या गेटवर जाण्यासाठी खूप चालावे लागते. अशा वेळी लांब ट्रॅव्हलेटरमुळे त्यांचा प्रवास सोपा होतो.
मॉल्समध्ये एका भागातून दुसऱ्या भागात जाण्यासाठी छोट्या आकाराचे ट्रॅव्हलेटर बसवलेले असतात.
जागा, प्रवाशांची गर्दी आणि सुरक्षितता या गोष्टी लक्षात घेऊन ट्रॅव्हलेटरची लांबी ठरवली जाते.
थोडक्यात सांगायचे तर, एस्केलेटर तुम्हाला मजले चढायला मदत करतो, तर ट्रॅव्हलेटर तुम्हाला न थकता लांबचे अंतर पार करायला मदत करतो.
