घरात पार्टीनंतर उरलेल्या पेपर कप्सचं काय करायचं? ते फेकून न देता त्यापासून सुंदर विंड चाइम बनवा. कमी खर्चात घर सजवण्याची ही सोपी आयडिया नक्की ट्राय करा.
आपल्याकडे घरी वाढदिवस, लग्न किंवा इतर कार्यक्रमांमध्ये कोल्ड्रिंकसाठी पेपर कप वापरले जातात. अनेकदा हे कप गरजेपेक्षा जास्त येतात आणि नंतर तसेच पडून राहतात. पण आता हे कप फेकून देऊ नका. यापासून तुम्ही घरासाठी सुंदर सजावटीच्या वस्तू बनवू शकता. तुम्हाला हे हँगिंग डेकोरेशन बनवण्यासाठी आणखी काही साहित्याची गरज लागेल. चला, पेपर कप्सपासून आकर्षक हँगिंग कसं तयार करायचं ते पाहूया.
पेपर कपपासून विंड चाइम बनवण्यासाठी लागणारे साहित्य
- पेपर कप
- रंगीत दोरा किंवा लोकर
- रंगीत मणी
- छोट्या घंटा
- कात्री आणि ग्लू गन
- कपसाठी वेगवेगळ्या रंगांचे पेंट
- आरसे, स्टिकर्स आणि ग्लिटर
- कपला छिद्र पाडण्यासाठी सुई किंवा टाचणी
- लटकवण्यासाठी रिंग किंवा एखादी काडी
- गोंडे आणि इतर सजावटीचे साहित्य
पेपर कपला तुमच्या आवडीचा रंग द्या
सगळ्यात आधी पेपर कप स्वच्छ करून घ्या आणि त्यानंतर तुमच्या आवडीच्या रंगाने ते रंगवा. आता ते सुकण्याची वाट पाहा. कप सुकल्यावर तुम्ही त्यावर तुमच्या आवडीनुसार आरसे, स्टिकर्स किंवा ग्लिटर लावू शकता. तुम्ही त्यावर वेगवेगळ्या डिझाइनची रंगीबेरंगी फुलंही काढू शकता, जे दिसायला खूप छान वाटतं. आता कपच्या तळाशी आणि कडेला सुई किंवा टाचणीने छिद्र पाडा. या छिद्रांमधून रंगीत दोरा किंवा लोकर घालून चांगली गाठ बांधा.
रंगीत लोकरीने कप सजवा
Related Articles
जर तुम्हाला पेपर कप रंगवायचे नसतील, तर तुम्ही रंगीबेरंगी लोकरीने ते गुंडाळू शकता. हे दिसायला खूपच सुंदर दिसतं. साधारण ४ ते ५ कप वेगवेगळ्या रंगांनी सजवा. त्यात पॉम-पॉम लटकन लावा. या पद्धतीने तुम्ही कमी मेहनतीत एक सुंदर हँगिंग तयार करू शकता.
हँगिंग लटकन तयार करा
कप तुमच्या आवडीप्रमाणे सजवून झाल्यावर आता ते लटकवण्याची वेळ आहे. सगळ्यात आधी दोऱ्यामध्ये ठिकठिकाणी मणी किंवा मोती घाला, जेणेकरून हँगिंग अधिक सुंदर दिसेल. तुम्ही यात छोट्या घंटाही लावू शकता, म्हणजे वाऱ्याने जेव्हा हे हलेल तेव्हा विंड चाइमसारखा मंजुळ आवाज येईल. आता दोऱ्यांची लांबी कमी-जास्त ठेवून बांधा, जेणेकरून विंड चाइम संतुलित दिसेल. हे हँगिंग तुम्ही बाल्कनी, भिंतीवर किंवा लिव्हिंग रूममध्ये लावू शकता.
