LED लाइट्सचा त्वचेवर खरंच दुष्परिणाम होतो का? नेमकं सत्य काय? जाणून घ्या
आरोग्य: सध्या जिथे पाहावे तिथे LED लाईट्स दिसतात. जास्त प्रकाश देत असल्यामुळे बाईक, कारसोबतच घरांमध्येही याचा वापर जास्त होतो. पण LED लाईट्समुळे त्वचेवर दुष्परिणाम होतो, अशा बातम्या येत आहेत.
LED लाईट्स सुरक्षित आहेत का? त्वचेसाठी खरंच धोकादायक आहेत?
आजकाल घरात आणि ऑफिसमध्ये जास्त वापरले जाणारे लाईट्स म्हणजे LED बल्ब. कमी वीज वापर आणि जास्त काळ टिकत असल्यामुळे ते लोकांमध्ये खूप लोकप्रिय झाले आहेत. पण, अलीकडे LED लाईट्समुळे त्वचेला नुकसान होते, असा प्रचार ऐकायला मिळत आहे. यात खरंच किती तथ्य आहे, ते आता पाहूया.
यूव्ही रेडिएशन म्हणजे काय?
सूर्यप्रकाशात असलेल्या अल्ट्राव्हायोलेट किरणांना यूव्ही रेडिएशन म्हणतात. हे तीन प्रकारचे असतात.
UVA: यामुळे त्वचेवर लवकर सुरकुत्या येतात.
UVB: यामुळे सनबर्न आणि त्वचेचे गंभीर नुकसान होते.
UVC: हे सर्वात धोकादायक किरण आहेत, पण ते पृथ्वीच्या वातावरणातच जास्त शोषले जातात.
यूव्ही किरणांचा प्रभाव जास्त असल्यास, त्वचा लवकर वृद्ध दिसू शकते.
LED बल्ब यूव्ही किरणे उत्सर्जित करतात का?
साधारणपणे घरात वापरले जाणारे LED बल्ब यूव्ही किरणे उत्सर्जित करत नाहीत किंवा अगदी कमी प्रमाणात उत्सर्जित करतात. एकूण प्रकाशात 1 टक्क्यांपेक्षा कमी यूव्ही असण्याची शक्यता असते. LED बल्बच्या निर्मिती प्रक्रियेमुळे यूव्ही किरणे बाहेर येण्यापासून रोखली जातात.
घरातील LED लाईट्समुळे धोका आहे का?
घरात वापरले जाणारे सामान्य पांढरे LED बल्ब त्वचा किंवा डोळ्यांना हानी पोहोचवत नाहीत. यातील यूव्हीची पातळी सूर्यप्रकाशाच्या तुलनेत खूपच कमी असते. रोज तासन्तास LED लाईटखाली बसल्यानेही त्वचेला कोणताही धोका नसतो, असे तज्ज्ञ सांगतात.
यूव्ही LED लाईट्स इतर कामांसाठी असतात
निर्जंतुकीकरण (sterilization), नेल क्युरिंग आणि औद्योगिक गरजांसाठी खास तयार केलेले यूव्ही LED लाईट्स असतात. ते सामान्य घरगुती वापरासाठी नसतात. असे लाईट्स घरात वापरले नाहीत, तर कोणताही धोका नाही. सामान्य LED बल्बबद्दल घाबरण्याची गरज नाही. थोडक्यात, सामान्य घरगुती वापराच्या LED लाईट्समुळे त्वचेला हानी पोहोचण्याची शक्यता नाही, असे तज्ज्ञ सांगतात.
