Car Market: भारतीय बाजारात फेब्रुवारी महिन्यात SUV गाड्यांची विक्रमी विक्री!
Car Market: फेब्रुवारी 2026 मध्ये भारतीय कार बाजारात SUV गाड्यांच्या विक्रीने अक्षरशः धुमाकूळ घातला आहे. मारुती सुझुकी, महिंद्रा आणि ह्युंदाईसारख्या मोठ्या ब्रँड्सनी या काळात विक्रीत मोठी वाढ नोंदवली आहे. काय आहेत यामागची कारणे जाणून घेऊयात…
SUV विक्रीत मोठी वाढ
भारतीय कार बाजारात SUV गाड्यांची क्रेझ दिवसेंदिवस वाढतच चालली आहे. ताज्या आकडेवारीनुसार, फेब्रुवारी 2026 या एका महिन्यात देशात तब्बल 2.36 लाख SUV गाड्या विकल्या गेल्या. गेल्या वर्षीच्या तुलनेत ही 13.48% ची वाढ आहे. सोसायटी ऑफ इंडियन ऑटोमोबाईल मॅन्युफॅक्चरर्स (SIAM) ने ही माहिती दिली आहे. फेब्रुवारी 2025 मध्ये 2.08 लाख SUV विकल्या गेल्या होत्या, पण यावर्षी मागणीत मोठी वाढ झाली आहे. चला, याबद्दल सविस्तर जाणून घेऊया.
SUV गाड्यांची लोकप्रियता
भारतीय ग्राहकांमध्ये SUV गाड्या वेगाने लोकप्रिय होत आहेत. जास्त ग्राउंड क्लिअरन्स, आकर्षक डिझाइन आणि रस्त्यावर मिळणारा दमदार लूक, या कारणांमुळे हॅचबॅक किंवा सेडान गाड्यांपेक्षा लोक SUV ला जास्त पसंती देत आहेत. यामुळेच मारुती सुझुकी ब्रेझा, ह्युंदाई क्रेटा आणि टाटा नेक्सॉन सारख्या गाड्या देशातील सर्वाधिक विकल्या जाणाऱ्या टॉप 10 गाड्यांच्या यादीत नेहमीच स्थान मिळवतात. देशातील सर्वात मोठी कार उत्पादक कंपनी मारुती सुझुकीने फेब्रुवारी 2026 मध्ये 72,756 SUV विकल्या. गेल्या वर्षी कंपनीने 65,033 युनिट्स विकले होते, म्हणजेच विक्रीत 11.87% वाढ झाली आहे.
कोणत्या कंपनीच्या किती गाड्यांची विक्री झाली?
SUV सेगमेंटमध्ये मजबूत पकड असलेल्या महिंद्रा अँड महिंद्राने फेब्रुवारीमध्ये 60,018 युनिट्स विकून 19.46% वाढ नोंदवली. दक्षिण कोरियन कंपनी ह्युंदाई मोटर कंपनीने फेब्रुवारी 2026 मध्ये 33,539 SUV विकल्या, जी गेल्या वर्षीच्या तुलनेत 1.1% नी जास्त आहे. किया कंपनीने 27,610 युनिट्स विकून 10.32% वाढ नोंदवली. जपानची कंपनी टोयोटाने 27,319 युनिट्स विकून 26.77% ची मजबूत वाढ मिळवली आहे. फेब्रुवारी 2026 मध्ये काही लहान कंपन्यांनीही चांगली कामगिरी केली. फोर्स मोटर्सच्या विक्रीत 349% वाढ झाली आणि कंपनीने 731 युनिट्स विकले. सिट्रोएनने 254% वाढीसह 950 युनिट्स आणि रेनॉल्टने 39% वाढीसह 3,120 युनिट्स विकले.
SUV गाड्यांचे वर्चस्व
मात्र, काही ब्रँड्सच्या विक्रीत घट झाली आहे. जीप कंपनीने फक्त 217 युनिट्स विकले (सुमारे 8% घट). इसुझूने 38 युनिट्स विकले (32% घट). एमजी मोटरने1,315 युनिट्स विकले (सुमारे 49% घट) आणि फोक्सवॅगनने 835 युनिट्स विकले (34% घट). दरम्यान, टाटा मोटर्सच्या फेब्रुवारी 2026 मधील SUV विक्रीची आकडेवारी अद्याप उपलब्ध झालेली नाही, त्यामुळे या यादीत कंपनीच्या नावाचा समावेश नाही. एकूणच, भारतीय वाहन बाजारात SUV सेगमेंट आपले स्थान अधिक मजबूत करत आहे. फेब्रुवारी 2026 मध्ये 2.36 लाख युनिट्सची विक्री आणि 13.48% वाढ हेच दर्शवते की, भविष्यात SUV गाड्यांचे वर्चस्व आणखी वाढणार आहे.
