Amul Price Hike : अमूल तूप आणि बटरच्या दरात मोठी वाढ, प्रति लिटर ५० रुपयांनी महागले

दूध उत्पादनाचा खर्च वाढल्यामुळे अमूलने तूप आणि बटरच्या दरात मोठी वाढ केली आहे. हे नवीन दर २ नोव्हेंबरपासून बाजारात लागू झाले आहेत.

नवी दिल्ली : देशातील प्रसिद्ध डेअरी ब्रँड 'अमूल'ने (Amul) आपले तूप (Ghee) आणि टेबल बटर (Table Butter) च्या दरात मोठी वाढ केली आहे. दूध उत्पादनाचा खर्च (Milk Production Cost) वाढल्याचे कारण देत अमूलने तुपाच्या दरात प्रति किलो/लिटर ५० रुपये आणि ५०० ग्रॅम बटरच्या पॅकवर १५ रुपयांची वाढ केली आहे. हे नवीन दर २ नोव्हेंबरपासून लागू झाले आहेत.

अमूल ब्रँड अंतर्गत दुग्धजन्य पदार्थांची विक्री करणाऱ्या 'गुजरात को-ऑपरेटिव्ह मिल्क मार्केटिंग फेडरेशन लिमिटेड' (GCMMF) ने इनपुट खर्च वाढल्यामुळे हा निर्णय घेतला आहे. संस्थेने दिलेल्या अधिकृत माहितीनुसार, अमूल टेबल बटर, अमूल तूप आणि अमूल गाईच्या तुपाच्या (Cow Ghee) कमाल किरकोळ किमतीत (MRP) वाढ करण्यात आली आहे.

"३६ लाख दूध उत्पादक शेतकऱ्यांच्या मालकीची सहकारी संस्था असलेल्या अमूलने, दूध उत्पादनाचा इनपुट खर्च वाढल्यामुळे बटर आणि तुपाच्या दरांचा आढावा घेऊन त्यात वाढ केली आहे," असे GCMMF ने आपल्या निवेदनात स्पष्ट केले आहे.

अमूल उत्पादनांचे जुने आणि नवीन दर

• अमूल टेबल बटर (५०० ग्रॅम पॅक):
• जुना दर: ₹३२५
• नवीन दर: ₹३४५ (वाढ: ₹१५)
• अमूल तूप (१ लिटर पाऊच):
• जुना दर: ₹६३०
• नवीन दर: ₹६८० (वाढ: ₹५०)
• अमूल गाईचे तूप / Cow Ghee (१ लिटर पाऊच):
• जुना दर: ₹६९५
• नवीन दर: ₹७३५ (वाढ: ₹४०)

कच्च्या दुधावर प्रक्रिया आणि उत्पादन खर्चाच्या आधारावर २ ऑक्टोबर ते २ नोव्हेंबर दरम्यान या दरांमध्ये सुधारणा करण्यात आली असून, आता नवीन दरपत्रक बाजारात अधिकृतपणे लागू झाले आहे.

१ लाख कोटींची उलाढाल

देशभरात दुग्धजन्य पदार्थांच्या क्षेत्रात मोठे साम्राज्य निर्माण करणाऱ्या अमूल ब्रँडची एकूण उलाढाल (Total Turnover) गेल्या आर्थिक वर्षात १ लाख कोटी रुपयांचा टप्पा ओलांडून ऐतिहासिक ठरली आहे. GCMMF ने मिळवलेल्या या उत्पन्नात त्यांच्या अंतर्गत येणाऱ्या १८ जिल्हा सहकारी संस्थांच्या स्वतंत्र उत्पन्नाचा समावेश नाही, हे विशेष. सणासुदीच्या काळात झालेल्या या दरवाढीमुळे दररोज अमूल बटर आणि तूप वापरणाऱ्या लाखो गृहिणी आणि छोट्या हॉटेल व्यावसायिकांच्या खिशाला कात्री लागणार आहे.