- Home
- Utility News
- तुमचे WhatsApp चॅट्स कोणी चोरून वाचतंय का? 'हे' ७ सेटिंग्स आत्ताच बदला, अन्यथा पश्चाताप होईल!
तुमचे WhatsApp चॅट्स कोणी चोरून वाचतंय का? 'हे' ७ सेटिंग्स आत्ताच बदला, अन्यथा पश्चाताप होईल!
आपल्यापैकी बहुतेक जण चॅटिंगसाठी व्हॉट्सॲपचा सर्वाधिक वापर करतात. त्यामुळे व्हॉट्सॲप मेसेजच्या सुरक्षेबद्दल आपल्याला चिंता वाटू शकते. व्हॉट्सॲपमधील सुरक्षा आणि प्रायव्हसी वाढवण्यासाठी हे आहेत सात सोपे मार्ग.
1. प्रायव्हसी चेकअप
व्हॉट्सॲपच्या 'सेटिंग्ज'मध्ये जाऊन 'प्रायव्हसी' पर्यायावर गेल्यास 'प्रायव्हसी चेकअप' हा पर्याय दिसेल. तुमचा डीपी, अबाउट इन्फॉर्मेशन, स्टेटस कोणी पाहावे हे ठरवण्यासाठी, तसेच लास्ट सीन/ऑनलाइन, रीड रिसीट्स सेट करण्यासाठी 'प्रायव्हसी चेकअप' या विभागात सोय आहे. तुम्हाला कोणी संपर्क साधावा हे ठरवण्याचा पर्यायही तिथे आहे. अनावश्यक कॉल्स आणि मेसेज नियंत्रित करण्यासाठी हा विभाग उपयुक्त आहे. तुम्हाला ग्रुपमध्ये कोणी ॲड करू शकेल हे ठरवण्याचा अधिकार, ब्लॉक केलेले कॉन्टॅक्ट्स मॅनेज करण्याची सुविधा यांचाही समावेश व्हॉट्सॲप सेटिंग्जमधील याच विभागात आहे.
2. डिसॲपिअरिंग मेसेजेस
व्हॉट्सॲपमधील चॅट्स एंड-टू-एंड एन्क्रिप्शनद्वारे सुरक्षित असले तरी, तुमचे डिव्हाइस कोणी हॅक केल्यास सर्व चॅट्स पाहता येतात. त्यामुळे, 'डिसॲपिअरिंग मेसेजेस' पर्याय सुरू केल्यास, मेसेज एका ठराविक वेळेनंतर आपोआप डिलीट होतील. यासाठी तुम्ही 24 तास, 7 दिवस किंवा 90 दिवस असा कालावधी सेट करू शकता. सेटिंग्ज > प्रायव्हसी > डिफॉल्ट मेसेज टाइमर या पर्यायावर टॅप करून 'डिसॲपिअरिंग मेसेजेस' सुरू करता येतात.
3. टू-फॅक्टर ऑथेंटिकेशन
तुमचे व्हॉट्सॲप अकाऊंट आणि चॅट्स सुरक्षित ठेवण्यासाठी तुम्ही 'पिन'सह 'टू-फॅक्टर ऑथेंटिकेशन' सुरू करू शकता. व्हॉट्सॲपच्या 'सेटिंग्ज'मध्ये जाऊन 'अकाऊंट'मध्ये प्रवेश करून टू-स्टेप व्हेरिफिकेशन आणि पिन सेट करता येतो. भविष्यात टू-स्टेप व्हेरिफिकेशन सहज रीसेट करण्यासाठी ईमेल ॲड्रेसही जोडू शकता. व्हॉट्सॲप अकाऊंटची सुरक्षा वाढवण्यासाठी 'पास-की' (Passkey) देखील वापरता येते.
4. ॲप लॉक आणि चॅट लॉक
व्हॉट्सॲप पूर्णपणे लॉक करून ठेवण्याचे आणि प्रत्येकाचे चॅट्स स्वतंत्रपणे लॉक करण्याचे मार्ग आहेत. फेस आयडी आणि टच आयडीद्वारे आयफोनवर आणि फिंगरप्रिंटद्वारे अँड्रॉइडवर व्हॉट्सॲप अकाऊंट लॉक करून सुरक्षित ठेवता येते. यासाठी व्हॉट्सॲप सेटिंग्जमधील प्रायव्हसी पर्यायातून 'ॲप लॉक' हा पर्याय निवडू शकता. विशेषतः एखाद्याच्या चॅटला अतिरिक्त सुरक्षा हवी असल्यास, फक्त ते 'चॅट लॉक' देखील करू शकता. यासाठी सेटिंग्ज - प्रायव्हसी - चॅट लॉक हा पर्याय निवडायचा आहे. व्ह्यू कॉन्टॅक्टमध्ये जाऊनही चॅट लॉक करता येते.
5. ॲडव्हान्स्ड सेटिंग्ज
सायबर फसवणूक करणाऱ्यांपासून तुमचे व्हॉट्सॲप अकाऊंट सुरक्षित ठेवण्यासाठी व्हॉट्सॲप काही नवीन सुविधाही देतं. व्हॉट्सॲप सेटिंग्जमधील प्रायव्हसी पर्यायातील 'ॲडव्हान्स्ड' पर्यायामध्ये हे पाहता येईल. यामध्ये अनोळखी अकाऊंटवरून येणारे मेसेज ब्लॉक करण्याची सुविधा, कॉल्समध्ये आयपी ॲड्रेस संरक्षित करण्याचे फीचर आणि लिंक प्रिव्ह्यू डिसेबल करण्याची सोय आहे.
6. ॲडव्हान्स्ड चॅट प्रायव्हसी
हे फीचर सुरू करण्यासाठी प्रत्येक वैयक्तिक आणि ग्रुप चॅटमध्ये जावे लागेल. हे तुमचे चॅट्स AI प्रशिक्षणासारख्या कामांसाठी ॲपच्या बाहेर नेण्यापासून प्रतिबंधित करते. तसेच मीडिया फाइल्स ऑटो-डाउनलोड होण्यापासून थांबवते. जर तुम्हाला एखाद्या व्यक्तीच्या चॅटमध्ये हे फीचर सुरू करायचे असेल, तर व्ह्यू कॉन्टॅक्ट > ॲडव्हान्स्ड चॅट प्रायव्हसी > टर्न इट ऑन या मार्गाने हे फीचर सेट करू शकता.
7. वन-टाइम व्ह्यूइंग
तुम्ही कोणाला फोटो किंवा व्हॉइस नोट्स पाठवताना अधिक प्रायव्हसी हवी असल्यास, वन-टाइम व्ह्यूइंग सुविधेचा वापर करू शकता. यासाठी मीडिया फाइल निवडल्यानंतर कॅप्शन फील्डमधील '1' आयकॉनवर टॅप करणे आवश्यक आहे. त्यानंतरच 'सेंड' बटणावर क्लिक करावे. व्हॉइस नोट्स पाठवताना, रेकॉर्ड बटणावर टॅप करून वरच्या दिशेने स्वाइप केल्यास '1' आयकॉन दिसेल. अशाप्रकारे रेकॉर्ड केलेल्या व्हॉइस नोट्स वन-टाइम हिअरिंग असतील.
