न्यूझीलंडविरुद्धच्या एकदिवसीय सामन्यात शून्यावर बाद झाल्यानंतर विराट कोहलीने सचिन तेंडुलकरच्या एका नकोशा विक्रमाची बरोबरी केली आहे. या सामन्यात अवघ्या ८९ धावांवर सर्वबाद झाल्याने भारताला २४४ धावांनी दारुण पराभव पत्करावा लागला.
माउंट मौंगानुई : न्यूझीलंडविरुद्धच्या चौथ्या एकदिवसीय सामन्यात विराट कोहली शून्यावर बाद झाला आणि त्याच्या नावावर एक नकोसा विक्रम नोंदवला गेला. भारताचा २४४ धावांनी झालेला दारुण पराभव आणि कोहलीची वैयक्तिक निराशा यामुळे हा दिवस भारतीयांसाठी अत्यंत खराब ठरला. मॅट हेन्रीच्या गोलंदाजीवर चौथ्याच चेंडूवर कोहली बाद झाला. त्याच षटकात हेन्रीने रोहित शर्मा (०) आणि श्रेयस अय्यर (०) यांनाही पॅव्हेलियनचा रस्ता दाखवला.
या खराब कामगिरीमुळे आंतरराष्ट्रीय एकदिवसीय क्रिकेटमध्ये कोहली २० व्यांदा शून्यावर बाद झाला आहे. यासह त्याने सचिन तेंडुलकरच्या नकोशा विक्रमाची बरोबरी केली. आता एकदिवसीय क्रिकेटमध्ये भारतासाठी सर्वाधिक वेळा शून्यावर बाद होण्याच्या विक्रमात कोहली आणि सचिन संयुक्तपणे पहिल्या स्थानावर आहेत. सचिन ४६३ सामन्यांत २० वेळा शून्यावर बाद झाला होता, तर कोहलीला हा आकडा गाठण्यासाठी केवळ ३२१ सामने लागले. जवागल श्रीनाथ १९ वेळा शून्यावर बाद होऊन तिसऱ्या स्थानावर आहे, तर अनिल कुंबळे आणि रोहित शर्मा प्रत्येकी १८ वेळा शून्यावर बाद झाले आहेत. या सामन्यात रोहित शर्माही 'गोल्डन डक'चा शिकार ठरला.
माउंट मौंगानुई येथे झालेल्या या सामन्यात ३३४ धावांच्या लक्ष्याचा पाठलाग करताना भारतीय संघ मॅट हेन्रीच्या भेदक गोलंदाजीसमोर गडगडला आणि अवघ्या २६.४ षटकांत ८९ धावांवर सर्वबाद झाला. अलीकडच्या काळातील हा भारताचा सर्वात लाजिरवाणा पराभव मानला जात आहे. २०२७ चा एकदिवसीय विश्वचषक जवळ येत असताना हा पराभव भारतासाठी मोठा धक्का आहे. सन २००० नंतर एकदिवसीय क्रिकेटमधील भारताची ही तिसरी सर्वात निचांकी धावसंख्या ठरली आहे.
Related Articles
याआधी ऑक्टोबर २००० मध्ये शारजाह येथे श्रीलंकेविरुद्ध ५४ धावा आणि २०१० मध्ये डंबुला येथे न्यूझीलंडविरुद्ध ८८ धावांवर भारतीय संघ बाद झाला होता. भारताच्या एकदिवसीय क्रिकेटच्या इतिहासातील ही सहावी सर्वात कमी धावसंख्या आहे. धावांच्या फरकाने विचार केल्यास, हा भारताचा दुसरा सर्वात मोठा पराभव (२४४ धावा) आहे. सन २००० मध्ये शारजाह येथे श्रीलंकेविरुद्ध झालेला २४५ धावांचा पराभव पहिल्या क्रमांकावर आहे.
