टीम इंडियातून बऱ्याच काळापासून बाहेर असलेल्या या खेळाडूच्या पुनरागमनामुळे संघाची बॅटिंग आणि ऑलराउंडरची अडचण दूर होईल, असा विश्वास कर्णधार शुभमन गिलने व्यक्त केलाय. जाणून घ्या सविस्तर...
मुंबई : टीम इंडियामध्ये त्याच्या दीर्घकाळापासून नसण्याने संघाच्या एकूण संतुलनावर मोठा परिणाम झालाय. पण, या जबरदस्त कौशल्य असलेल्या खेळाडूने आंतरराष्ट्रीय क्रिकेटमध्ये कमबॅक केल्यास भारताची लोअर मिडल ऑर्डर आणि ऑलराउंडरची कमतरता पूर्णपणे भरून निघेल, असा ठाम विश्वास भारताचा वनडे कर्णधार शुभमन गिलने व्यक्त केलाय.
सातव्या आणि आठव्या क्रमांकाच्या समस्येवर तोडगा
न्यूझीलंडविरुद्धच्या पहिल्या वनडे सामन्यापूर्वी झालेल्या पत्रकार परिषदेत कर्णधार शुभमन गिलने हार्दिक पांड्याचं महत्त्व मोकळेपणाने सांगितलं. गिल म्हणाला, "हार्दिक पांड्या संघात परतला, तर आमची सातव्या आणि आठव्या क्रमांकाची चिंता पूर्णपणे मिटेल. बॅटिंगच्या बाबतीत आम्ही एक अतिशय संतुलित आणि मजबूत संघ दिसू."
याआधी काय अडचण आली होती?
भारतीय क्रिकेट संघात सहसा ६ व्या किंवा ७ व्या क्रमांकावर बॅटिंग करणारा हार्दिक पांड्या गेल्या इंडियन प्रीमियर लीग (आयपीएल) हंगामानंतर दुखापतींमुळे संघाबाहेर आहे. नुकतंच तो भारत 'अ' संघाकडून स्पर्धात्मक क्रिकेटमध्ये कमबॅक करण्याच्या तयारीत होता, पण मांडीचे स्नायू दुखावल्याने त्याला पुन्हा माघार घ्यावी लागली.
फास्ट बॉलिंग ऑलराउंडर म्हणून तोड नाही!
हार्दिक पांड्याच्या बॉलिंग आणि बॅटिंगचं कौतुक करताना गिल म्हणाला, "सर्वात आधी म्हणजे, हार्दिक एक उत्कृष्ट खेळाडू आहे. तो संघात जे कौशल्य आणि दर्जा आणतो, ते जगातल्या मोजक्याच खेळाडूंकडे आहे. फास्ट बॉलिंग ऑलराउंडर म्हणून तो सामन्याच्या कोणत्याही टप्प्यावर प्रभावी ठरू शकतो. नव्या बॉलने सुरुवातीच्या ओव्हर्स टाकणं, मिडल ओव्हर्समध्ये विकेट्स काढणं आणि डेथ ओव्हर्समध्ये अचूक बॉलिंग करण्याची त्याची क्षमता आहे. यासोबतच लोअर मिडल ऑर्डरमध्ये तो जी आक्रमक बॅटिंग करतो, ती भारतीय संघासाठी खूप मोलाची आहे."
पांड्याचं नसणं हे दुर्दैवी; गिल
आयपीएल संपल्यानंतर प्रमुख ऑलराउंडर पांड्याला बऱ्याच काळासाठी मुकावं लागल्याबद्दल विचारलेल्या प्रश्नावर गिलने नाराजी व्यक्त केली. "आयपीएलनंतर त्याला एकही सामना खेळता न येणं हे खरंच दुर्दैवी आहे," असं गिल म्हणाला. गिलच्या या बोलण्यातून भारतीय संघ पांड्याच्या असण्यावर किती अवलंबून आहे, हे स्पष्टपणे दिसून येतं.
देशांतर्गत क्रिकेटमधून कमबॅकचा प्लॅन!
३२ वर्षीय हार्दिक पांड्याच्या आपण सतत संपर्कात असून, भारतीय संघात सामील होण्यापूर्वी तो काही देशांतर्गत सामने खेळून आपला फिटनेस सिद्ध करेल, अशी अपेक्षा गिलने व्यक्त केली. "होय, माझं आणि हार्दिकचं अनेकदा बोलणं झालंय. तो भारत 'अ' कडून सामने खेळणार होता. पण त्या सामन्यापूर्वीच त्याला पुन्हा काही शारीरिक अडचणींचा सामना करावा लागला," असं गिलने स्पष्ट केलं.
