इंग्लंड आणि वेल्स क्रिकेट बोर्डाला (ECB) 2027 पर्यंत तब्बल 627 कोटी रुपयांचे मोठे आर्थिक नुकसान होण्याची शक्यता आहे. भारतासोबत मायदेशात कोणतीही मालिका नसणे आणि आयसीसीने (ICC) ब्रॉडकास्टिंगचे पैसे रोखून धरणे ही दोन प्रमुख कारणे यामागे आहेत.

इंग्लंड क्रिकेट बोर्ड (ECB) सध्या एका मोठ्या आर्थिक संकटात सापडण्याची चिन्हं आहेत. एका अंदाजानुसार, इंग्लंड आणि वेल्स क्रिकेट बोर्डाला 2027 च्या आर्थिक वर्षात सुमारे 50 दशलक्ष डॉलर्स म्हणजेच तब्बल 627 कोटी रुपयांचे नुकसान सहन करावे लागू शकते.

कोट्यवधींच्या नुकसानीची दोन मुख्य कारणे

  • या कालावधीत इंग्लंडच्या संघाने भारतासोबत मायदेशात कोणतीही मालिका आयोजित केलेली नाही.
  • आंतरराष्ट्रीय क्रिकेट परिषद (ICC) सदस्य बोर्डांना मिळणाऱ्या ब्रॉडकास्टिंग पैशांचा काही भाग रोखून ठेवण्याचा विचार करत आहे.

द गार्डियनच्या वृत्तानुसार, ईसीबीला 2025 मध्येच या संभाव्य नुकसानीचा अंदाज आला होता. बोर्डाचे 2027 चे आर्थिक वर्ष 31 जानेवारी 2028 पर्यंत चालणार आहे. या काळात होणाऱ्या वेगवेगळ्या स्पर्धांमधून जास्तीत जास्त कमाई करण्यासाठी बोर्डाने एक ठोस योजना आखली आहे.

मात्र, आयसीसी नेमके किती पैसे रोखून धरणार आहे हे अद्याप स्पष्ट झालेले नाही. हा आकडा साधारणपणे 439 कोटी रुपयांपर्यंत खाली येऊ शकतो अशी चर्चा आहे. 2027 च्या ब्रॉडकास्ट वाटपातून आयसीसी किती रक्कम थांबवेल, यावर अद्याप शिक्कामोर्तब झालेले नाही. 2025 मध्ये बोर्डाने 12.6 दशलक्ष नफा कमावला होता. दौऱ्यांचे वेळापत्रक आणि आयसीसीकडून मिळणारे पैसे यावर एकाच चक्रात आर्थिक परिस्थिती किती झपाट्याने बदलू शकते, हे यातून स्पष्ट होते.

ईसीबीसोबत नेमकं काय घडलं?

क्रिकेटमधील आर्थिक नफा-तोटा हा आंतरराष्ट्रीय क्रिकेटच्या वेळापत्रकावर अवलंबून असतो. उन्हाळ्यात कोणते संघ इंग्लंड दौऱ्यावर येतात हे खूप महत्त्वाचे ठरते. भारतासोबतची मायदेशातील मालिका ही व्यावसायिकदृष्ट्या जागतिक क्रिकेटमधील सर्वात फायदेशीर मालिकांपैकी एक मानली जाते. त्यामुळे 2027 मध्ये भारतीय संघाचा दौरा नसणे हा इंग्लंडला मोठा फटका असेल.

आयसीसी ब्रॉडकास्टिंग सायकलच्या शेवटच्या वर्षात सदस्य बोर्डांना मोठी रक्कम दिली जाते, कारण याच काळात पुरुषांचा 50 षटकांचा विश्वचषक खेळवला जातो. 2027 मध्ये आयसीसी पुढील ब्रॉडकास्ट कराराची तयारी करत असल्याने, 2028 मध्ये सुरू होणाऱ्या त्या सायकलसाठी काही रक्कम रोखून धरत आहे. मात्र, नेमकी किती रक्कम रोखली जाईल हे अद्याप ठरलेले नाही.

सध्या ईसीबीचा सोनी पिक्चर्ससोबत 6 वर्षांचा करार आहे, ज्याचे मूल्य 185 दशलक्ष पौंड म्हणजे सुमारे 2,323 कोटी रुपये इतके आहे. हा करार 2028 मध्ये संपणार आहे. सूत्रांच्या माहितीनुसार, पुढचा करार हा आताच्या सोनी पिक्चर्सच्या कराराएवढा फायदेशीर नसेल.