Rinku Singh Wedding: समाजवादी पार्टीच्या (Samajwadi Party) खासदार प्रिया सरोजसोबत (Priya Saroj) रिंकू सिंगचा साखरपुडा आधीच पार पडलाय. आता आयपीएलमध्ये (IPL) कोलकाता नाईट रायडर्सकडून (Kolkata Knight Riders) खेळणारा हा स्टार फलंदाज लवकरच लग्नबंधनात अडकणार आहे. त्याच्या लग्नाची जोरदार तयारी सुरू झाली आहे.
Rinku Singh-Priya Saroj Wedding: रिंकू सिंगने सहकुटुंब पंतप्रधान नरेंद्र मोदी (Prime Minister Narendra Modi) यांची भेट घेऊन त्यांना लग्नाचं आमंत्रण दिलं आहे. समाजवादी पार्टीच्या (Samajwadi Party) खासदार प्रिया सरोजसोबत (Priya Saroj) हा स्टार क्रिकेटर आपल्या आयुष्याची नवी इनिंग सुरू करणार आहे. लग्नाची जोरदार तयारी सुरू आहे. ४ डिसेंबरला लखनौच्या (Lucknow) एका हॉटेलमध्ये हा विवाहसोहळा पार पडणार आहे. त्याआधी रिंकूने पंतप्रधानांची भेट घेत त्यांच्या हाती लग्नाची पत्रिका दिली आणि त्यांचे आशीर्वादही घेतले. या भेटीचे फोटो रिंकूने स्वतःच्या सोशल मीडिया हँडलवर शेअर केले आहेत. त्याने लिहिलंय, 'आमचे माननीय पंतप्रधान श्री नरेंद्र मोदी यांची सहकुटुंब भेट घेणं, त्यांना लग्नाचं आमंत्रण देणं आणि त्यांचे आशीर्वाद घेणं, हा माझ्यासाठी मोठा सन्मान आहे. आमच्या कुटुंबासाठी हा खरोखरच एक खूप खास क्षण आहे.'
उत्तर प्रदेशचे मुख्यमंत्रीही लग्नाला निमंत्रित
याआधी रिंकूच्या कुटुंबाने उत्तर प्रदेशचे मुख्यमंत्री योगी आदित्यनाथ (Uttar Pradesh Chief Minister Yogi Adityanath) यांनाही लग्नाचं आमंत्रण दिलं आहे. रिंकूची आई वीणा देवी, भाऊ सोनू सिंग आणि बहीण नेहा सिंग यांनी लखनौमध्ये मुख्यमंत्र्यांच्या निवासस्थानी जाऊन त्यांना पत्रिका दिली होती. आता दोन्ही कुटुंबांमध्ये लग्नाची शेवटच्या टप्प्यातील तयारी सुरू आहे. या लग्नसोहळ्याला क्रिकेट आणि राजकीय क्षेत्रातील अनेक दिग्गज उपस्थित राहण्याची शक्यता आहे.
क्रिकेट आणि राजकारणाचा संगम
८ जून २०२५ ला लखनौच्या एका हॉटेलमध्ये रिंकू आणि प्रिया यांचा साखरपुडा पार पडला होता. या कार्यक्रमानंतर आता तब्बल दीड वर्षांनी ते लग्नबंधनात अडकत आहेत. रिंकू सध्या भारतीय लिमिटेड ओव्हर्स टीमचा महत्त्वाचा खेळाडू आहे. तर दुसरीकडे, प्रिया ही समाजवादी पार्टीची खासदार असून ती मछलीशहर लोकसभा मतदारसंघाचं प्रतिनिधित्व करते. साखरपुड्यानंतर प्रिया अनेकदा रिंकूचा खेळ पाहण्यासाठी स्टेडियममध्ये दिसली आहे. कोलकाता नाईट रायडर्ससाठी (Kolkata Knight Riders) इडन गार्डन्सवर (Eden Gardens) खेळताना तिने रिंकूला चीअर केल्याचंही पाहायला मिळालं होतं.
