Dy CM Eknath Shinde demands Mayor post : मुंबई महापालिका निवडणुकीनंतर भाजप सर्वात मोठा पक्ष ठरला असला तरी, सत्तास्थापनेसाठी त्यांना एकनाथ शिंदे गटाची गरज आहे.
Dy CM Eknath Shinde demands Mayor post : मुंबई महानगरपालिकेच्या निवडणुकीचे निकाल लागल्यानंतर आता खऱ्या अर्थाने सत्तेचा संघर्ष सुरू झाला आहे. गेल्या २५ वर्षांपासून मुंबईवर शिवसेनेची एकहाती सत्ता राहिली आहे, मात्र यावेळी राजकीय समीकरणे पूर्णपणे बदलली आहेत. महापालिकेत भाजप ८९ जागांसह सर्वात मोठा पक्ष म्हणून समोर आला असला, तरी सत्तास्थापनेच्या चाव्या मात्र एकनाथ शिंदे यांच्या नेतृत्वाखालील शिवसेनेकडे आहेत. याच पार्श्वभूमीवर मुख्यमंत्री एकनाथ शिंदे यांनी आता महापौरपदासाठी भाजपवर दबाव वाढवल्याने युतीमधील संघर्ष टोकाला जाण्याची शक्यता निर्माण झाली आहे.
शिंदेंची 'तिरकी चाल' आणि भाजपची कोंडी
निवडणुकीत भाजप-शिंदे सेना युती म्हणून लढली असली, तरी निकालात भाजपला स्पष्ट बहुमत गाठता आलेले नाही. दुसरीकडे, शिवसेना उद्धव बाळासाहेब ठाकरे गट आणि मनसे एकत्र येऊनही आकडा गाठू शकले नाहीत. अशा परिस्थितीत भाजपला सत्ता स्थापन करण्यासाठी एकनाथ शिंदेंच्या २९ नगरसेवकांची नितांत गरज आहे. हीच संधी साधून शिंदेंनी महापौरपदाचा आग्रह धरला आहे. "पहिली अडीच वर्षे शिवसेनेचा महापौर असावा," असा प्रस्ताव त्यांनी भाजपसमोर ठेवून एक प्रकारे 'चेकमेट' दिला आहे.
हॉटेल 'ताज लँड्स एंड' आणि नगरसेवकांची तटबंदी
शिंदेंनी आपल्या २९ नगरसेवकांना मुंबईतील 'ताज लँड्स एंड' या हॉटेलमध्ये ठेवले आहे. पक्षाकडून याला 'मार्गदर्शन शिबिर' असे नाव दिले जात असले, तरी राजकीय वर्तुळात वेगळ्याच चर्चा आहेत. विशेष म्हणजे, उद्धव ठाकरेंपेक्षा भाजपच आपले नगरसेवक फोडू शकते, अशी धास्ती शिंदे गटाला वाटत असल्याचे समजते. म्हणूनच आपल्या नगरसेवकांना सुरक्षित ठेवून शिंदेंनी भाजपला वाटाघाटीसाठी टेबलवर आणले आहे.
Related Articles
बाळासाहेबांचे जन्मशताब्दी वर्ष आणि भावनिक मुद्दा
एकनाथ शिंदे यांनी महापौरपदाचा दावा करताना भावनिक कार्डही खेळले आहे. दिवंगत शिवसेनाप्रमुख बाळासाहेब ठाकरे यांचे हे जन्मशताब्दी वर्ष आहे. अशा महत्त्वाच्या वर्षी शिवसेनेला मुख्यमंत्रिपद मिळाले नसले, तरी किमान मुंबईचा महापौर तरी शिवसेनेचाच असावा, असा युक्तिवाद शिंदे गटाकडून केला जात आहे. जर मुंबईत शिवसेनेचा महापौर बसला नाही, तर शिंदे गटावर 'शिवसेना संपवल्याचा' जो आरोप ठाकरे गटाकडून केला जातो, त्याला बळ मिळेल, अशी भीती शिंदेंना वाटत आहे.
युतीमध्ये बिघाड की केवळ दबावतंत्र?
सोशल मीडियावर सध्या काही व्हिडिओ व्हायरल होत आहेत, ज्यामध्ये शिंदे समर्थक भाजपसोबतची युती तोडण्याची घोषणाबाजी करताना दिसत आहेत. यावरून युतीमध्ये अंतर्गत धुसफूस असल्याचे स्पष्ट होत आहे. भाजपने ३० वर्षांच्या संघर्षानंतर मुंबईत मोठे यश मिळवले आहे, त्यामुळे ते सहजासहजी महापौरपद सोडतील असे वाटत नाही. मात्र, शिंदेंनी धरलेला हा हट्ट केवळ सत्तेसाठी आहे की स्वतःचे अस्तित्व सिद्ध करण्यासाठी, हे पाहणे महत्त्वाचे ठरेल.
"देवाची इच्छा असेल तर शिवसेनेचाच महापौर होईल," हे उद्धव ठाकरेंचे विधान आता एकनाथ शिंदे खरे करणार का? की भाजप आपल्या बळावर शिंदेंचे मनसुबे धुळीला मिळवणार? याकडे संपूर्ण महाराष्ट्राचे लक्ष लागले आहे. सध्याची परिस्थिती पाहता, मुंबई महापालिकेत सत्ता स्थापन करताना भाजप आणि एकनाथ शिंदे यांच्यातील संघर्ष अटळ आहे आणि या संघर्षात कोण वरचढ ठरते, यावरच मुंबईचे आगामी राजकारण अवलंबून असेल.
