वरिष्ठ आयएएस अधिकारी अश्विनी भिडे लवकरच बीएमसीच्या आयुक्तपदी विराजमान होण्याची शक्यता आहे, ज्यामुळे त्या या पदावरील पहिल्या महिला ठरतील. 'मेट्रो वुमन' म्हणून ओळखल्या जाणाऱ्या भिडे यांच्याकडून मुंबईतील पायाभूत प्रकल्प पूर्ण करण्याच्या मोठ्या अपेक्षा आहेत.
मुंबई महानगरपालिकेच्या इतिहासात एक महत्त्वाचा टप्पा गाठला जात आहे. वरिष्ठ आयएएस अधिकारी अश्विनी भिडे या लवकरच बीएमसीच्या (BMC) आयुक्तपदी विराजमान होण्याची शक्यता असून, त्या या पदावर पोहोचणाऱ्या पहिल्या महिला ठरणार आहेत.
कोण आहेत अश्विनी भिडे?
अश्विनी भिडे या 1995 बॅचच्या आयएएस अधिकारी असून महाराष्ट्र कॅडरमध्ये त्यांनी अनेक महत्त्वाच्या पदांवर काम केले आहे. प्रशासनातील त्यांची ठाम निर्णयक्षमता आणि कामाचा वेग यासाठी त्या ओळखल्या जातात. सध्या त्या मुख्यमंत्री कार्यालयात अतिरिक्त मुख्य सचिव म्हणून कार्यरत होत्या.
‘मेट्रो वुमन’ म्हणून ओळख
मुंबई मेट्रो प्रकल्पात विशेषतः मेट्रो लाईन-3 (कोलाबा-बांद्रा-सीप्झ) प्रकल्पात त्यांनी महत्त्वाची भूमिका बजावली. त्यामुळे त्यांना “मेट्रो वुमन” अशी ओळख मिळाली आहे.
Related Articles
बीएमसीच्या इतिहासात पहिली महिला आयुक्त
सध्याचे आयुक्त भूषण गगराणी यांच्या निवृत्तीनंतर अश्विनी भिडे यांची नियुक्ती निश्चित मानली जात आहे. त्यांच्या नियुक्तीमुळे बीएमसीच्या 130 वर्षांच्या इतिहासात पहिल्यांदाच महिला आयुक्त मिळणार आहे, ही मोठी ऐतिहासिक घटना ठरणार आहे.
मोठी जबाबदारी आणि अपेक्षा
मुंबईत सुरू असलेल्या मोठ्या पायाभूत प्रकल्पांमुळे पुढील काही वर्षे अत्यंत महत्त्वाची मानली जात आहेत. अशा वेळी अनुभवी आणि कडक प्रशासक म्हणून ओळख असलेल्या भिडे यांच्याकडून मेट्रो आणि इन्फ्रास्ट्रक्चर प्रकल्प पूर्ण करणे, पूर नियंत्रण आणि पावसाळी तयारी, नागरी सेवा सुधारणा यांसारख्या बाबींमध्ये मोठ्या अपेक्षा व्यक्त केल्या जात आहेत.
