Raigad Tamhini Ghat Accident: रायगड जिल्ह्यातील ताम्हिणी घाटात चालत्या कारवर दरड कोसळून एका महिलेचा दुर्दैवी मृत्यू झाला आहे. पुण्याहून मानगावला जात असताना सनरूफमधून दगड आत घुसल्याने ही भीषण दुर्घटना घडली.
Raigad Tamhini Ghat Accident: रायगड जिल्ह्यातील ताम्हिणी घाट पुन्हा एकदा दुर्घटनेने हादरला आहे. चालत्या आलिशान कारवर दरड कोसळल्याने एका महिलेचा जागीच मृत्यू झाला आहे. अपघात इतका अचानक झाला की, गाडीतील प्रवाशांना स्वतःला सावरण्याची संधीही मिळाली नाही.
घातक क्षण: दगड सनरूफ फोडून आत घुसला
मिळालेल्या माहितीनुसार, स्नेहल गुजराती (वय 43) या आपल्या कुटुंबासह पुण्याहून मानगावच्या दिशेने कारने प्रवास करत होत्या. कार ताम्हिणी घाटातील एका तीव्र वळणावरून जात असतानाच अचानक डोंगरावरून मोठी दरड कोसळली. या दरडीतील दगड थेट कारच्या सनरूफवर आदळला आणि आत घुसत स्नेहल गुजराती यांच्या डोक्याला जबर धक्का बसला.
उपचाराआधीच झाला मृत्यू
स्नेहल गुजराती यांना तत्काळ जवळच्या रुग्णालयात दाखल करण्यात आलं. मात्र, गंभीर दुखापतीमुळे डॉक्टरांनी त्यांना मृत घोषित केलं. या घटनेनंतर ताम्हिणी घाटातील सुरक्षा उपाययोजनांबद्दल पुन्हा एकदा प्रश्नचिन्ह उपस्थित झालं आहे. स्थानिक नागरिक आणि प्रवाशांनी प्रशासनाकडे दरड कोसळण्यापासून बचावासाठी कायमस्वरूपी उपाययोजना करण्याची मागणी केली आहे.
Related Articles
दरवर्षी पावसाळ्यात दरडीचा धोका
दरवर्षी पावसाळ्याच्या काळात ताम्हिणी घाटात अशा दरडी कोसळण्याच्या घटना वारंवार घडतात. जरी प्रशासनाकडून साफसफाई आणि इशारा फलक लावले जात असले तरी, पुरेशा सुरक्षात्मक उपाययोजना नाहीत, अशी प्रवाशांची नाराजी व्यक्त होत आहे. सध्या पोलिसांनी या घटनेचा पंचनामा केला असून, संबंधित विभागाकडून अधिक तपास सुरू आहे.
‘घाट प्रवास म्हणजे मृत्यूचा प्रवास?’
या दुर्घटनेनंतर एक गंभीर प्रश्न पुन्हा ऐरणीवर आला आहे.
"घाटरस्त्यांवरील प्रवाशांच्या सुरक्षिततेसाठी नेमकं कोण जबाबदार?"
स्नेहल गुजराती यांच्या मृत्यूनंतर नागरिकांमध्ये भीती निर्माण झाली असून,
“ताम्हिणी घाटातून प्रवास करणं म्हणजे जीव धोक्यात घालणं” असं अनेकांचं म्हणणं आहे.
कुटुंबावर दु:खाचं सावट
या अपघातामुळे गुजराती कुटुंबावर दुःखाचं सावट पसरलं आहे. तसेच कोकणात दरवर्षीच सर्पदंश आणि विंचूदंशासारख्या नैसर्गिक दुर्घटनांनीही अनेकांचे जीव घेतले आहेत. ताम्हिणी घाटातील ही घटना त्या यादीतील आणखी एक दुर्दैवी भर ठरली आहे.
