गोकुळ दूध उत्पादक संघाने ४ मेपासून दुधाच्या दरात वाढ केली आहे. फुल क्रीम दूध ₹७४ प्रती लिटर आणि गाय दूध ₹५८ प्रती लिटर असे नवे दर असतील. महागाई आणि उत्पादन खर्चातील वाढ हे दरवाढीचे कारण सांगण्यात येत आहे.
कोल्हापूर - महागाईच्या ओझ्याखाली दबलेल्या सर्वसामान्यांसाठी आणखी एक धक्का – कोल्हापूर दूध उत्पादक संघाने गोकुळ ब्रँडच्या दुधाच्या दरात वाढ करण्याची अधिकृत घोषणा केली आहे. अमुलने काही दिवसांपूर्वी दरवाढ करताच, गोकुळ संघानेही त्याच दिशेने पावले टाकली आहेत. आता, ४ मेपासून नवे दर लागू होत असून, मुंबई, ठाणे, रायगड, पालघरसह राज्यातील अनेक भागातील ग्राहकांना दरमहा जास्त खर्चाचा सामना करावा लागणार आहे. नवे दर काय असणार?
- फुल क्रीम दूध (क्लासिक) – ₹७४ प्रती लिटर
- फुल क्रीम ५ लिटर पॅक – ₹३६५
- गाय दूध (सात्विक) – ₹५८ प्रती लिटर
टोण्ड दूध (ताजा) आणि गोकुळ शक्ती या प्रकारांच्या दरात मात्र सध्या कोणताही बदल होणार नसल्याचे स्पष्ट करण्यात आले आहे. दरवाढीमागचं गणित
जागतिक बाजारात चलती असलेल्या महागाईच्या लाटेचा परिणाम भारतावरही जाणवत आहे. अमेरिकेच्या टॅरिफ निर्णयामुळे आंतरराष्ट्रीय पातळीवर वस्तूंच्या किंमतीत अस्थिरता निर्माण झाली आहे. याचा अप्रत्यक्ष परिणाम दुधाच्या उत्पादन खर्चावर झाला असून, वाहतूक, पशुखाद्य, वितरण खर्चात मोठी वाढ झाल्याचे संघाकडून सांगण्यात येते. ग्राहकांच्या खिशावर 'दूधाचा भार'
Related Articles
अमुलनंतर गोकुळनेही दरवाढ केली असल्याने, 'एकाच वेळी दोन्ही प्रमुख ब्रँड्सची दरवाढ का?' असा सवाल ग्राहकांमध्ये निर्माण झाला आहे. महिना अखेरीस खर्चाचा आकडा वाढत असल्याने अनेकांचा बजेट बिघडत आहे. फक्त दोन रुपयांची दरवाढ असली, तरी नियमित ग्राहकांना याचा मोठा परिणाम जाणवतो. शेतकऱ्यांना लाभ, पण...
संघाच्या म्हणण्यानुसार, या दरवाढीचा काही भाग थेट दूध उत्पादक शेतकऱ्यांपर्यंत पोहोचवण्यात येईल, मात्र दर वाढवताना ग्राहकांवर होणारा आर्थिक ताण लक्षात घेतल्याची कोणतीही ठोस हमी संघाकडून देण्यात आलेली नाही. नियमनाची गरज?
सततच्या दरवाढींमुळे सरकारने या मुद्द्याकडे गांभीर्याने लक्ष देण्याची मागणी जोर धरू लागली आहे. ग्राहक संघटना आणि नागरिकांनी दूध दरवाढीस मर्यादा घालण्याच्या उपाययोजना राबवण्याची मागणी केली आहे.
