महाराष्ट्र निवडणूक: 'द वायर'चे दावे आयोगाने फेटाळले

मुंबई: महाराष्ट्रात मतदानापेक्षा ५,०४,३१३ जास्त मते मोजली गेली, या 'द वायर'च्या दाव्याला निवडणूक आयोगाने फेटाळले आहे. 'द वायर'ने प्रसिद्ध केलेला अहवाल तथ्यहीन असल्याचे निवडणूक आयोगाने म्हटले आहे. प्रसिद्ध झालेली आकडेवारी पोस्टल मतपत्रिकांशिवायची आहे आणि ती न जोडल्यामुळेच 'द वायर'ला चूक झाली असावी, असे आयोगाने स्पष्ट केले. मतदान झालेल्या मतांपेक्षा जास्त मते मोजली गेली नाहीत आणि 'द वायर'ने अतिरिक्त मते म्हणून ज्यांचा उल्लेख केला आहे ती पोस्टल बॅलेट आहेत, असे निवडणूक आयोगाने म्हटले आहे. पोस्टल मतपत्रिकांची गणना ईव्हीएम मतांमध्ये केली जात नाही, असेही निवडणूक आयोगाने स्पष्ट केले आहे.

यापूर्वी, महाराष्ट्र विधानसभा निवडणुकीत मोजलेल्या मतांमध्ये आणि मतदान झालेल्या मतांमध्ये तफावत असल्याचे 'द वायर'ने आपल्या अहवालात म्हटले होते. भारत निवडणूक आयोगाच्या आकडेवारीनुसार, एकूण मतदान ६४,०८८,१९५ झाले होते. त्यानुसार अंतिम मतदान टक्केवारी ६६.०५ टक्के होती, असे निवडणूक आयोगाने स्पष्ट केले. निकाल जाहीर झाल्याच्या दिवशी एकूण ६४,५९२,५०८ मते मोजली गेली. याचा अर्थ, निवडणुकीच्या दिवशी मतदान झालेल्या मतांपेक्षा ५,०४,३१३ जास्त मते मोजली गेली, असे 'द वायर'ने म्हटले होते.

राज्यातील आठ मतदारसंघांमध्ये मोजलेली मते मतदान झालेल्या मतांपेक्षा कमी होती, तर २८० मतदारसंघांमध्ये मतदान झालेल्या मतांपेक्षा जास्त मते मोजली गेली, असे अहवालात म्हटले आहे. आष्टी मतदारसंघात मतदानापेक्षा ४५३८ जास्त मते मोजली गेली, असेही अहवालात नमूद करण्यात आले होते.

दरम्यान, राज्याच्या विधानसभा निवडणुकीत भाजप युतीने इतिहासातील सर्वाधिक जागा जिंकल्या. १५२ पैकी ८० टक्के जागा जिंकून भाजपने एकट्याने १३२ जागा जिंकल्या. एकूण २८८ जागांपैकी महायुतीने २३८ जागा जिंकल्या. ईव्हीएमवरून विरोधकांनी आरोप केल्यानंतर 'द वायर'चा अहवाल समोर आला.