Black Coffee Benefits : रोज ब्लॅक कॉफी पिण्याचे 7 भन्नाट फायदे, जाणून घ्या
दरवर्षी १ ऑक्टोबरला जगभरात 'आंतरराष्ट्रीय कॉफी दिवस' साजरा केला जातो. इंटरनॅशनल कॉफी ऑर्गनायझेशन हा दिवस साजरा करते. तुम्हाला माहितीये का? रोज एक कप ब्लॅक कॉफी प्यायल्याने अनेक आजार आपल्यापासून दूर राहतात.
ब्लॅक कॉफी पिण्याचे ७ आरोग्यदायी फायदे
मुंबई : दरवर्षी १ ऑक्टोबरला जगभरात 'आंतरराष्ट्रीय कॉफी दिवस' साजरा केला जातो. इंटरनॅशनल कॉफी ऑर्गनायझेशन हा दिवस साजरा करते. रोज एक कप ब्लॅक कॉफी प्यायल्याने अनेक आजार आपल्यापासून दूर राहतात.
ब्लॅक कॉफीमुळे स्मरणशक्ती आणि मूड सुधारतो
कॅफीनमुळे आपल्याला जागं राहायला आणि कामावर लक्ष केंद्रित करायला मदत मिळते. यामुळे आपली स्मरणशक्ती आणि मूड दोन्ही सुधारतात. काही संशोधनांनुसार, कॉफी प्यायल्याने अल्झायमर आणि पार्किन्सनसारख्या गंभीर आजारांपासूनही संरक्षण मिळू शकते.
ब्लॅक कॉफी शरीरातील चरबी कमी करते, असा अभ्यासाचा दावा
ब्लॅक कॉफीमध्ये कॅलरीजचे प्रमाण खूपच कमी असते. ही कॉफी शरीरातील चरबी जाळायला आणि मेटाबॉलिझमचा वेग वाढवायला मदत करते. एका अभ्यासानुसार, ब्लॅक कॉफीचे जास्त सेवन केल्याने शरीरातील अतिरिक्त चरबी कमी होते.
ब्लॅक कॉफी प्यायल्याने यकृताचे नुकसान टळते
कॉफी आपल्या यकृताचे (Liver) आरोग्य चांगले ठेवते आणि यकृताच्या आजारांपासून आपले रक्षण करते. रोज ब्लॅक कॉफी प्यायल्याने यकृताचे नुकसान आणि फॅटी लिव्हरसारख्या आजारांचा धोका कमी होतो.
ब्लॅक कॉफीमुळे टाईप २ मधुमेहाचा धोका कमी होतो
मधुमेहाच्या रुग्णांसाठी ब्लॅक कॉफी सहसा सुरक्षित मानली जाते. तरीही, काही लोकांमध्ये कॅफीनमुळे रक्तातील साखर आणि इन्सुलिनच्या पातळीत तात्पुरता बदल होऊ शकतो. जे लोक नियमितपणे ब्लॅक कॉफी पितात, त्यांना टाईप २ मधुमेह होण्याचा धोका खूप कमी असतो.
कॉफी प्यायल्याने हृदयविकाराचा धोका १५ टक्क्यांनी कमी होतो
रोज ब्लॅक कॉफी प्यायल्याने हार्ट फेल्युअर, स्ट्रोक आणि कोरोनरी आर्टरी डिसीजचा धोका कमी होतो. तज्ज्ञांच्या मते, दिवसातून ३ ते ५ कप कॉफी प्यायल्याने हृदयविकाराचा धोका तब्बल १५ टक्क्यांनी कमी होतो.
रोज किमान ४ कप कॉफी पिणाऱ्यांमध्ये नैराश्याचा धोका कमी
कॉफी प्यायल्याने नैराश्याचा (Depression) धोका कमी होतो, असे काही अभ्यासांतून समोर आले आहे. १४,००० पेक्षा जास्त विद्यार्थ्यांवर केलेल्या एका अभ्यासात असे आढळले की, रोज फक्त एक कप कॉफी पिणाऱ्यांच्या तुलनेत, रोज किमान ४ कप कॉफी पिणाऱ्यांमध्ये नैराश्याचा धोका खूप कमी असतो.
थकवा दूर करून एनर्जी वाढवणारी कॅफीन कॉफीमध्ये असते
कॉफीमध्ये कॅफीन असते, जे आपला थकवा दूर करते आणि शरीरातील एनर्जी वाढवते. कॅफीन आपल्या मेंदूतील 'अडेनोसिन' (adenosine) या न्यूरोट्रान्समीटरला ब्लॉक करते. यामुळे मेंदूमध्ये 'डोपामिन' (dopamine) सारख्या इतर न्यूरोट्रान्समीटर्सची पातळी वाढते आणि आपल्याला एकदम फ्रेश वाटते.
