Shoe Cleaning Tips : वॉशिंग मशीनमध्ये शूज धुताय? ही चूक कधीच करू नका
तुमचे आवडते शूज खराब झाल्यावर तुम्ही ते लगेच वॉशिंग मशीनमध्ये टाकता का? असे करण्यापूर्वी काही महत्त्वाच्या गोष्टी जाणून घेणे खूप गरजेचे आहे.

वॉशिंग मशीनमध्ये शूज कसे धुवावेत?
रोजच्या वापरात शूजवर धूळ, माती आणि चिखल साचणे सामान्य आहे. ते साफ करण्यासाठी अनेक जण वॉशिंग मशीनचा वापर करतात. पण, सर्व प्रकारचे शूज मशीनमध्ये धुता येत नाहीत. कॅनव्हास, कॉटन, नायलॉन, पॉलिस्टर आणि मेशपासून बनलेले काही शूज तुम्ही मशीनमध्ये धुवू शकता. पण लेदर (चामड्याचे) शूज मशीनमध्ये कधीच टाकू नका. धुण्यापूर्वी शूजवर दिलेल्या सूचना नक्की वाचा. कंपनीने परवानगी दिली नसेल तर ते शूज मशीनमध्ये धुणे टाळा.

आधी शूज तयार करा!
मशीनमध्ये शूज टाकण्यापूर्वी त्याची लेस आणि आतले इनसोल (पॅड) काढून वेगळे करा. त्यानंतर एका मऊ ब्रशने किंवा जुन्या टूथब्रशने शूजवरची सुकी माती आणि धूळ काढून टाका. विशेषतः तळाच्या खाचांमधील घाण साफ करा. शूजवर जिद्दी डाग असतील तर डाग काढणाऱ्या लिक्विडचा वापर करा. त्यानंतर शूज एका जाळीदार पिशवीत किंवा जुन्या उशीच्या कव्हरमध्ये ठेवून मगच धुवा.
योग्य पद्धतीने मशीन चालवा
शूज धुताना मशीनची 'जेंटल सायकल' (हळूवार फिरणारी सेटिंग) निवडणे चांगले. थंड पाण्याचा वापर केल्याने रंग उडण्याचा आणि शूजचा आकार बिघडण्याचा किंवा गम निघण्याचा धोका कमी होतो. खूप जास्त डिटर्जंट वापरू नका. थोडेसे लिक्विड डिटर्जंट पुरेसे आहे. मशीनमध्ये शूज एकमेकांवर आदळू नयेत म्हणून काही जुने टॉवेल सोबत टाका. ब्लीचसारखी कठोर रसायने वापरणे नेहमी टाळा.
लेस आणि इनसोल वेगळे साफ करा!
शूजची लेस जाळीदार पिशवीत ठेवून तुम्ही मशीनमध्ये धुवू शकता किंवा कोमट पाण्यात थोडे डिटर्जंट टाकून हाताने चोळून साफ करू शकता. इनसोलला मऊ कापड आणि हलक्या साबणाने हाताने साफ करणे कधीही चांगले. शूजमध्ये पुन्हा घालण्यापूर्वी ते पूर्णपणे सुकलेले असावेत.
ड्रायरमध्ये टाकू नका.. नैसर्गिकरित्या सुकवा!
मशीनमध्ये धुवून झाल्यावर लगेच शूज बाहेर काढा. त्यांना कधीच ड्रायरमध्ये टाकू नका. जास्त उष्णतेमुळे शूजचा गोंद (गम) खराब होऊ शकतो आणि त्यांचा आकारही बदलू शकतो. एका स्वच्छ टॉवेलने शूज हलक्या हाताने दाबून जास्तीचे पाणी काढून टाका आणि आतमध्ये वर्तमानपत्राचे बोळे किंवा कोरडे कापड ठेवा. त्यानंतर शूज थेट उन्हात न ठेवता हवेशीर ठिकाणी सुकायला ठेवा.

