Esophageal Cancer : गरम चहा-कॉफी पिताय? सावधान, या गंभीर आजाराचा धोका वाढू शकतो
तुम्हालाही वाफाळलेला चहा किंवा कॉफी प्यायला आवडते का? एका नव्या संशोधनानुसार, अतिगरम पेये प्यायल्याने अन्ननलिकेचे नुकसान होते आणि कॅन्सरचा धोका वाढतो.
गरम चहा, कॉफी किंवा पाणी पिण्याची सवय तुम्हालाही आहे का?
अतिगरम पेये प्यायल्याने अन्ननलिकेला हानी पोहोचते आणि कॅन्सरचा धोका वाढतो, असा इशारा एका नव्या अभ्यासात दिलाय. संशोधकांनी यूकेमधील तब्बल १० लाख लोकांवर हा अभ्यास केला. यात असं दिसलं की, जे लोक खूप गरम चहा किंवा कॉफी पितात, त्यांना अन्ननलिकेचा कॅन्सर (Esophageal cancer) होण्याची शक्यता जास्त असते.
अतिगरम पेये पिणाऱ्यांना 'अन्ननलिकेच्या कॅन्सर'चा धोका जास्त
जे लोक अतिगरम पेये पितात, त्यांना अन्ननलिकेचा कॅन्सर होण्याचा धोका सामान्य तापमान असलेली पेये पिणाऱ्यांपेक्षा तीन पटीने जास्त असतो. हे गरम द्रव जेव्हा पोटात जाते, तेव्हा ते अन्ननलिकेच्या आतील पेशींचे मोठे नुकसान करते.
गरम पेये आणि अन्ननलिकेच्या कॅन्सरचा थेट संबंध
चहा किंवा कॉफी थोडे कोमट होईपर्यंत वाट पाहण्याचा सल्ला संशोधक देतात. दक्षिण अमेरिकेत लोक 'मेट' (mate) नावाचे अतिगरम हर्बल पेय पितात. तिथे झालेल्या संशोधनातही गरम पेये आणि अन्ननलिकेच्या कॅन्सरचा थेट संबंध सिद्ध झालाय, अशी माहिती संशोधक डॉ. केरेन पापीयर यांनी दिली.
ऑक्सफर्ड विद्यापीठाच्या संशोधकांचा अभ्यास
ऑक्सफर्ड विद्यापीठाच्या संशोधकांनी हा अभ्यास केलाय. 'इंटरनॅशनल जर्नल ऑफ कॅन्सर' या मासिकात हा अहवाल प्रसिद्ध झालाय. संशोधकांनी ६५ अंश सेल्सिअस किंवा त्याहून अधिक तापमान असलेल्या पेयांना "अतिगरम" म्हटले आहे. दिवसातून सहा किंवा त्याहून अधिक वेळा अशी गरम पेये पिणे आरोग्यासाठी अत्यंत धोकादायक असल्याचे त्यांनी स्पष्ट केले.
मद्यपान आणि धूम्रपानामुळे कॅन्सरचा धोका वाढतो
अन्ननलिकेला त्रास देणाऱ्या सवयींमुळे कॅन्सरचा धोका वाढतो. अन्न गिळताना त्रास होणे, मद्यपान, धूम्रपान, लठ्ठपणा, गॅस्ट्रोएसोफेजल रिफ्लक्स डिसीज (GERD) आणि अतिगरम पेये पिण्याची सवय ही या कॅन्सरची प्रमुख कारणे आहेत.
धूम्रपान आणि मद्यपान सोडल्यास कॅन्सरचा धोका कमी
धूम्रपान आणि मद्यपान कमी केल्यास स्क्वामस सेल अन्ननलिकेचा कॅन्सर टाळता येऊ शकतो. छातीत जळजळ, अपचन, घसा किंवा छातीत दुखणे आणि अचानक वजन कमी होणे ही अन्ननलिकेच्या कॅन्सरची प्रमुख लक्षणे आहेत.
स्क्वामस सेल अन्ननलिकेचा कॅन्सर (Squamous cell oesophageal cancer) दुर्मिळ
स्क्वामस सेल अन्ननलिकेचा कॅन्सर (Squamous cell oesophageal cancer) हा एक अत्यंत दुर्मिळ आजार आहे. दरवर्षी केवळ काही हजार लोकांनाच याची लागण होते. धूम्रपानासारख्या इतर सवयींमुळेही अन्ननलिकेचा कॅन्सर होण्याचा धोका वाढतो, असे संशोधकांनी स्पष्ट केले आहे.
