Coconut : नारळाला तीन डोळे का असतात? यामागचं खरं कारण माहितेय?
Coconut : नारळाला एका बाजूला तीन छिद्रे असतात. या छिद्रांना डोळे म्हणतात. ही छिद्रे का तयार होतात, याबद्दल अनेकांना माहिती नसते. नारळाला तीन छिद्रे असण्यामागचे नेमके कारण काय आहे?

नारळाला तीन छिद्रे
नारळाचा उपयोग आपण पूजेत, स्वयंपाकात आणि पेय म्हणून अनेक प्रकारे करतो. पण नारळाचे नीट निरीक्षण केल्यास, त्याच्या वरच्या बाजूला तीन डोळ्यांसारख्या खुणा दिसतात. नारळाला तीन डोळे का असतात? त्यांचे काम काय? असा प्रश्न अनेकांना पडतो. खरं तर ते डोळे नसतात. वनस्पतिशास्त्रानुसार, बी विकसित होत असताना तयार झालेल्या तीन नैसर्गिक छिद्रांच्या त्या खुणा आहेत. नारळाच्या फुलापासून फळ तयार होताना तीन बीजांडे असतात. फळ जसे मोठे होते, तसे त्यातील एकच पूर्णपणे विकसित होते. बाकीच्या दोन्हींची वाढ थांबते. याच खुणा नारळाच्या वरच्या बाजूला तीन लहान खड्ड्यांसारख्या दिसतात.

नारळाला तीन छिद्रे असण्यामागचं कारण
या तीन खुणांपैकी एकच खूप मऊ असते. इतर दोन्हींच्या तुलनेत या भागातील कवच पातळ असते. याला एक खास कारण आहे. या मऊ भागाखालीच नारळाच्या बीजातील भ्रूण (एम्ब्रियो) असतो. भविष्यात याच भ्रूणातून नवीन नारळाचे झाड वाढते. फळाला अंकुर फुटताना या मऊ भागातूनच एक छोटासा कोंब बाहेर येतो. म्हणूनच याला जर्मिनेशन पोर म्हणतात. इतर दोन खुणांजवळचे कवच कठीण असते. म्हणूनच नारळाचे पाणी पिण्यासाठी छिद्र पाडायचे असल्यास हा मऊ भाग निवडला जातो. अनेकांना वाटते की या तीन खुणांमधून पावसाचे पाणी नारळात जाते, पण ते खरे नाही.
नारळात पाणी कसे येते?
याचे उत्तर नारळाच्या झाडाच्या मुळांमध्ये आहे. झाड जमिनीतील पाणी मुळांद्वारे शोषून घेते. ते पाणी झाडातील विशेष वाहिन्यांमधून वर प्रवास करून फळात पोहोचते. फळ वाढत असताना हे पाणी पोषक तत्त्वे असलेल्या द्रवात बदलते. यालाच वैज्ञानिक भाषेत 'लिक्विड एंडोस्पर्म' म्हणतात. हेच आपण पितो ते नारळाचे पाणी. फळ जसजसे मोठे होते, तसतसा या द्रवातील काही भाग पांढऱ्या खोबऱ्यात बदलतो. उरलेला भाग पाणी म्हणून राहतो. अशा प्रकारे नारळातील तीन खुणा आणि पाणी तयार होण्याच्या प्रक्रियेमागे एक अद्भुत नैसर्गिक रहस्य दडलेले आहे.

