Geyser Warning Signs : गिझर बदलण्याची वेळ आलीये का? ही 5 लक्षणं दिसल्यास व्हा सावध
Geyser Warning Signs: हिवाळ्यात आपण जास्त वापरत असलेले गिझर पूर्णपणे खराब होण्याआधी काही इशारे देते. ही ५ मुख्य लक्षणे ओळखा आणि गिझर कधी बदलायचे ते जाणून घ्या.
गिझर खराब होण्याची लक्षणे
हिवाळा आला की सकाळी आंघोळीपासून ते भांडी घासण्यापर्यंत गरम पाण्यासाठी आपण गिझरवर अवलंबून असतो. जास्त काळ वापरल्यानंतर गिझरमधून विचित्र आवाज येऊ लागतात. गिझर पूर्णपणे बंद पडण्याआधी ते काही धोक्याचे इशारे देते. खाली दिलेली ही ५ लक्षणे सांगून देतात की आता गिझर बदलण्याची वेळ आली आहे.
पाण्याची गळती (Water Leakage)
गिझरच्या टाकीखाली किंवा आजूबाजूला तुम्हाला सतत पाणी दिसत असेल, तर हे गळतीचे (लीकेज) लक्षण आहे. गिझर खूप जुने झाल्यामुळे अशी गळती होऊ शकते. या गळतीमुळे तुमच्या गिझरला गंज लागण्याची दाट शक्यता असते.
वायरिंगमधील बिघाड
गिझर गळत असेल तर फक्त वरवरची दुरुस्ती करून सोडून देऊ नका. एका चांगल्या मेकॅनिकला बोलावून आत नेमका काय प्रॉब्लेम आहे ते तपासा आणि दुरुस्त करून घ्या. वाफ साचणे, वायरिंगमधील बिघाड किंवा लूज कनेक्शन यांसारख्या कारणांमुळे गिझरमधून पाणी गळू शकते.
पाण्याचा रंग बदलणे
नळातून येणारे पाणी पिवळे किंवा गंजल्यासारखे वाटत असेल, तर गिझरच्या आत गंज लागला आहे हे समजून जा. गिझरमधील अ‍ॅनोड रॉड खराब झाल्यामुळे पाणी पिवळे होते. खूप वर्षे वापरल्याने हा रॉड झिजतो. वेळेवर हा रॉड बदलला तर गिझरचे आयुष्य वाढते आणि धोकाही टळतो.
गिझरमधून येणारे विचित्र आवाज
गिझरमध्ये काही बिघाड असेल, तर पाणी गरम होताना त्यातून विचित्र आवाज येऊ लागतात. गिझरच्या टाकीत पाण्याचे क्षार जास्त प्रमाणात साचल्यास असे आवाज येतात. या घाणीमुळे पाणी गरम होण्याची प्रक्रिया खूप संथ होते. टाकी स्वच्छ करूनही जर आवाज येतच असतील, तर समजून जा की गिझर बदलण्याची वेळ आली आहे.
पाणी गरम होण्यासाठी लागणारा जास्त वेळ
गिझरमधील गरम पाणी लवकर संपत असेल आणि पाणी गरम व्हायला खूप वेळ लागत असेल, तर उष्णता देण्याची प्रक्रिया मंदावली आहे असे समजा. घरात माणसे जास्त असतील किंवा अनेक ठिकाणी गरम पाण्याचे कनेक्शन असेल, तर असे होऊ शकते. इलेक्ट्रिक गिझरमध्ये खराब झालेले थर्मोस्टॅट किंवा हीटिंग एलिमेंट सुद्धा याला कारणीभूत असू शकते. हा प्रॉब्लेम तपासण्यासाठी तंत्रज्ञाची मदत घ्या. तपासणीनंतरही त्रास कायम राहिल्यास गिझर नक्की बदला.
