Heart Health Habits : तुमच्या हृदयाला गुपचूप नुकसान पोहोचवणाऱ्या 5 सवयी
हृदयाचे आरोग्य जपणे आजच्या काळात खूप गरजेचे आहे. तुमच्या नकळत काही सवयी हृदयाला नुकसान पोहोचवू शकतात.
हृदयाला नुकसान पोहोचवणाऱ्या ५ सवयी
हृदयाला निरोगी ठेवणं अत्यंत महत्त्वाचं आहे. हृदय हा आपल्या शरीराचा एक अतिशय नाजूक अवयव आहे, जो शरीराच्या सर्व भागांमध्ये ऑक्सिजनयुक्त रक्त पोहोचवतो. आजकाल जगभरात मृत्यूचं सर्वात मोठं कारण हृदयविकार हेच बनलं आहे.
चुकीची जीवनशैली हृदयाच्या आरोग्यासाठी घातक ठरते.
चुकीची जीवनशैली आपल्या हृदयाच्या आरोग्यावर वाईट परिणाम करते. नोएडा येथील कैलाश हॉस्पिटलचे सीनियर कन्सल्टंट इंटरव्हेंशनल कार्डिओलॉजिस्ट डॉ. सुनील कुमार मंडल यांनी अशा ५ सवयी सांगितल्या आहेत, ज्या हृदयाला नुकसान पोहोचवू शकतात.
फळांचे ज्यूस आणि स्मूदीज हृदयासाठी ठरू शकतात घातक.
फळांचे ज्यूस आणि स्मूदीज पिण्याने हृदयाला नुकसान होऊ शकतं. फळं हृदयासाठी चांगली असतात, पण ज्यूस नाही. ज्यूस बनवताना फळांमधले फायबर निघून जातात आणि त्यात साखरेचं प्रमाण खूप वाढतं. यामुळे रक्तातली साखर अचानक वाढते. साखर जास्त काळ वाढलेली राहिल्यास वजन वाढतं, शरीरात सूज येते आणि ट्रायग्लिसराइड्स वाढतात. बाजारात मिळणाऱ्या स्मूदीजमध्ये तर कोल्ड्रिंक्सइतकीच साखर असते.
'शुगर-फ्री' लेबल असलेले स्नॅक्सही हृदयाला पोहोचवतात नुकसान.
पॅकेटवरचे लेबल्स अनेकदा आपली दिशाभूल करतात. फॅट-फ्री पदार्थांची चव टिकवण्यासाठी कंपन्या त्यात जास्त साखर, सोडियम किंवा रिफाइंड स्टार्च मिसळतात. 'शुगर-फ्री' लेबल असलेले स्नॅक्ससुद्धा खूप जास्त प्रोसेस्ड असतात. हे पदार्थ खाल्ल्याने तुम्हाला वारंवार भूक लागण्याची शक्यता असते.
पुरेशी विश्रांती न घेता अति व्यायाम केल्यास हृदयावर ताण येतो.
हृदय निरोगी ठेवण्यासाठी व्यायाम करणं हा एक उत्तम मार्ग आहे. पण, पुरेशी विश्रांती न घेता खूप कठीण व्यायाम केल्यास कार्डिओव्हस्कुलर सिस्टीमवर ताण येतो. यामुळे शरीरात स्ट्रेस हार्मोन्स वाढतात आणि हृदयाचे ठोके अनियमित (cardiac arrhythmia) होऊ शकतात. त्यामुळे व्यायाम नेहमी प्रमाणात करा. आठवड्यातून १५० मिनिटे हलका व्यायाम पुरेसा आहे. तसेच, विश्रांतीसाठी काही दिवस नक्की राखून ठेवा. छातीत दुखणे, श्वास घेण्यास त्रास होणे किंवा चक्कर येणे अशी लक्षणे दिसल्यास त्याकडे अजिबात दुर्लक्ष करू नका.
वारंवार जेवण टाळल्याने नंतर जास्त खाण्याची सवय लागते.
जेवण टाळल्याने वजन तर कमी होत नाहीच, उलट काही वेळा ते धोकादायक ठरू शकतं. वारंवार जेवण टाळल्याने आपण नंतर जास्त जेवतो (overeating). कार्डिओलॉजिस्ट सांगतात की, यामुळे शरीराचं चक्र बिघडतं आणि ब्लड प्रेशर, कोलेस्ट्रॉल तसंच ब्लड शुगर वाढण्याची शक्यता असते. शरीराचं मेटाबॉलिझम चांगलं ठेवण्यासाठी ठराविक वेळेत संतुलित आहार घेणं खूप गरजेचं आहे.
रात्री ७ तासांपेक्षा कमी झोप घेतल्यास हृदयविकाराचा धोका वाढतो.
झोपेच्या कमतरतेचा हृदयावर थेट परिणाम होतो. अनेक अभ्यासांनुसार, रात्री ७ तासांपेक्षा कमी झोप घेतल्यास हाय ब्लड प्रेशर, वजन वाढणे आणि हृदयविकाराचा धोका वाढतो. त्याचप्रमाणे, तणावपूर्ण जीवनशैलीमुळे शरीरात कॉर्टिसोल आणि एड्रेनालाईन यांसारख्या हार्मोन्सचं प्रमाण वाढतं. यामुळे लोक जास्त जेवतात आणि व्यायाम करणं टाळतात.
