आसामच्या नुमालीगढमध्ये एक जंगली हत्ती थेट खेळण्याच्या मैदानात घुसला आणि चक्क फुटबॉलसोबत खेळू लागला. या अनोख्या घटनेचा व्हिडिओ सध्या सोशल मीडियावर तुफान व्हायरल झाला आहे.
आसामच्या नुमालीगढमधून एक अजब व्हिडिओ समोर आला आहे. इथे एक जंगली हत्ती थेट मुलांच्या खेळण्याच्या मैदानात घुसला आणि चक्क फुटबॉल खेळू लागला. या अनोख्या घटनेचा व्हायरल व्हिडिओ सध्या सोशल मीडियावर धुमाकूळ घालत आहे. ही घटना बोगीढाला मैदानावरील आहे. व्हिडिओमध्ये दिसतंय की, हा हत्ती आरामात मैदानात फिरत आहे आणि मध्येच फुटबॉलला पायाने ढकलत आहे. यावेळी काही मुलंही जवळच उभी होती. त्यांच्यासाठी हा एक अविस्मरणीय वन्यजीव अनुभव होता.
आसाममध्ये मोठ्या संख्येने जंगली आशियाई हत्ती आढळतात. त्यामुळे तिथे माणसं आणि हत्ती समोरासमोर येण्याच्या घटना वारंवार घडत असतात. अनेकदा अन्नाच्या आणि पाण्याच्या शोधात हे हत्ती मानवी वस्तीजवळ येतात आणि शेतात किंवा इतर वस्त्यांमध्ये घुसतात.
काही दिवसांपूर्वीच आसाममध्ये हत्तीच्या बचावाची एक वेगळी घटना घडली होती. गेल्या आठवड्यात गोलाघाट जिल्ह्यात एका जंगली हत्तीच्या गळ्यात ट्रॅक्टरचा टायर अडकला होता. वनविभागाने अनेक तासांच्या प्रयत्नानंतर त्या हत्तीची सुखरूप सुटका केली होती.
