तेलंगणाच्या महेश्वरममधील श्री शिवगंगा राजराजेश्वर स्वामी मंदिराच्या तलावात एक कार कोसळल्याचा व्हिडिओ व्हायरल झाला आहे.
मुंबई : रविवारी मध्यरात्री हैदराबादच्या वेशीवर असलेल्या रंगा रेड्डी जिल्ह्यातील महेश्वरममध्ये एक थरारक घटना घडली. इथल्या श्री शिवगंगा राजराजेश्वर स्वामी मंदिराच्या तलावात (ज्याला स्थानिक भाषेत कोनेरू म्हणतात) एक भरधाव टोयोटा इनोव्हा क्रिस्टा कार थेट जाऊन कोसळली. सुदैवाने ड्रायव्हरने वेळीच गाडीतून बाहेर उडी मारली, त्यामुळे तो बचावला. या घटनेत कुणालाही दुखापत झालेली नाही. कार तलावात बुडत असल्याचा व्हिडिओ सोशल मीडियावर व्हायरल झाल्यानंतर हा प्रकार उघडकीस आला. यानंतर लोकांनी रस्ते सुरक्षा आणि मंदिराच्या आजूबाजूला संरक्षक भिंत बांधण्याची मागणी सुरू केली आहे.
तीव्र वळणावर ड्रायव्हरचं नियंत्रण सुटलं
प्राथमिक माहितीनुसार, महेश्वरम गेटजवळ एका तीव्र वळणावर गाडी वळवताना ड्रायव्हरचं कारवरचं नियंत्रण सुटलं. त्यामुळे कार रस्त्यावरून खाली उतरली आणि थेट मंदिराच्या तलावात जाऊन पडली.
गाडी पाण्यात जाताच ड्रायव्हरने प्रसंगावधान राखून लगेच कारचा दरवाजा उघडला आणि तो सुखरूप बाहेर आला. अपघाताच्या वेळी कारमध्ये त्याच्याशिवाय दुसरं कुणीही नव्हतं.
ही घटना मध्यरात्री घडली. त्यावेळी मंदिराच्या आजूबाजूला कुणीही भाविक किंवा नागरिक उपस्थित नव्हते. त्यामुळे एक मोठा अनर्थ टळला.
महेश्वरम पोलीस सध्या या संपूर्ण प्रकरणाचा तपास करत आहेत.
व्हिडिओमुळे रस्ते सुरक्षेवर चर्चा सुरू
या व्हायरल व्हिडिओवर सोशल मीडिया युजर्स वेगवेगळ्या प्रतिक्रिया देत आहेत. एका युजरने तर कार पाण्यात बुडाल्याचं पाहून मजेत लिहिलंय, 'विसर्जन यशस्वीरीत्या पार पडलं.'
दुसऱ्या एका युजरने तेलंगणा सरकारमधील अधिकाऱ्यांना टॅग करत मंदिराभोवती संरक्षक भिंत बांधण्याची मागणी केली आहे. जेणेकरून भविष्यात असे अपघात टळतील आणि भाविकांची सुरक्षा सुनिश्चित होईल, विशेषतः जेव्हा मंदिरात मोठी गर्दी असते.
काही युजर्सनी ड्रायव्हरच्या निष्काळजीपणावरही प्रश्न उपस्थित केले आहेत. गाडी चालवताना ड्रायव्हर मोबाईलवर रील्स किंवा व्हिडिओ बघत असावा, असा अंदाज एका युजरने वर्तवला आहे. मात्र, ड्रायव्हरचं लक्ष विचलित झाल्यामुळेच हा अपघात झाला, याचा कोणताही ठोस पुरावा अद्याप समोर आलेला नाही.
पोलीस सध्या या अपघाताच्या नेमक्या कारणांचा शोध घेत आहेत.
