सण-उत्सव महत्त्वाचे आहेतच, पण लोकांचं आरोग्य आणि पर्यावरण त्याहून जास्त महत्त्वाचं आहे, असं सुप्रीम कोर्टाने स्पष्ट केलं. प्रदूषण रोखण्यासाठी आतापर्यंत काय पावलं उचलली, याची माहिती सरकारने कोर्टाला दिली.
नवी दिल्ली: फटाके फोडण्याच्या मुद्द्यावर सुप्रीम कोर्टाने एक अत्यंत महत्त्वाचं निरीक्षण नोंदवलं आहे. कोर्टाच्या आदेशांची अंमलबजावणी न केल्याबद्दल कोर्टाने दिल्ली सरकार आणि 'एअर क्वालिटी मॅनेजमेंट'ला चांगलंच फटकारलं. आदेश न पाळणं म्हणजे सुप्रीम कोर्टाची खिल्ली उडवण्यासारखं आहे, अशा शब्दांत कोर्टाने संताप व्यक्त केला. तसंच, ज्या भागात हवेचं प्रदूषण जास्त आहे, तिथे तुम्ही काही तपासणी केली का, असा थेट सवालही कोर्टाने विचारला.
फक्त फटाक्यांच्या विक्रीवर निर्बंध आणून प्रदूषण थांबणार नाही. फटाक्यांवर पूर्ण बंदी घालण्यापेक्षा त्यांच्यावर योग्य नियंत्रण ठेवणं गरजेचं आहे, असं सुप्रीम कोर्टाने स्पष्ट केलं. ज्या दोन दिवशी फटाके फोडायला परवानगी दिली आहे, त्या दिवशी विशेष लक्ष ठेवण्याचे आदेशही कोर्टाने दिले आहेत. सण आणि उत्सव साजरे करणं ठीक आहे, पण लोकांचं आरोग्य आणि पर्यावरणाचं रक्षण करणं ही आपली प्राथमिकता असली पाहिजे, याची आठवण कोर्टाने करून दिली. दरम्यान, प्रदूषण रोखण्यासाठी आतापर्यंत नेमकी काय कारवाई केली, याचा अहवाल सरकारने कोर्टात सादर केला.
