व्यावसायिक एलपीजी गॅसच्या दरवाढीनंतर आता पेट्रोल आणि डिझेलच्या दरातही वाढ होण्याची शक्यता वर्तवली जात आहे. आंतरराष्ट्रीय बाजारात कच्च्या तेलाच्या किमती वाढल्याने तेल कंपन्यांवर दबाव वाढला असून, हा तोटा भरून काढण्यासाठी दरवाढ केली जाऊ शकते. सध्या दर स्थिर असले तरी, आगामी काळात इंधन दरवाढीची शक्यता नाकारता येत नाही.
देशातील सर्वसामान्यांसाठी पुन्हा एकदा महागाईचा फटका बसण्याची शक्यता व्यक्त केली जात आहे. व्यावसायिक एलपीजी गॅस सिलेंडरच्या किमतीत वाढ झाल्यानंतर आता पेट्रोल आणि डिझेलच्या दरातही वाढ होऊ शकते, अशी चर्चा सुरू झाली आहे. त्यामुळे नागरिकांमध्ये चिंतेचे वातावरण निर्माण झाले आहे. आंतरराष्ट्रीय बाजारात कच्च्या तेलाच्या किमतींमध्ये मोठी उसळी पाहायला मिळाली आहे. काही दिवसांपूर्वी क्रूड ऑइलचे दर प्रति बॅरल 126 डॉलरपर्यंत गेले होते. सध्या दर काहीसे कमी झाले असले तरी ते अजूनही 110 डॉलरच्या वर असल्याने तेल कंपन्यांवर दबाव वाढला आहे.
दर झाले स्थिर
गेल्या अनेक महिन्यांपासून देशात पेट्रोल आणि डिझेलचे किरकोळ दर स्थिर ठेवण्यात आले आहेत. मात्र जागतिक बाजारातील वाढत्या किमतीमुळे सरकारी तेल कंपन्यांना तोटा सहन करावा लागत असल्याची माहिती समोर येत आहे. हा तोटा भरून काढण्यासाठी दरवाढीचा पर्याय समोर येऊ शकतो. दरम्यान, काही दिवसांपूर्वी पेट्रोल-डिझेल दरवाढीबाबत सोशल मीडियावर अनेक दावे व्हायरल झाले होते. मात्र केंद्र सरकारने असे दावे फेटाळून लावत कोणतीही अधिकृत घोषणा झालेली नसल्याचे स्पष्ट केले होते. त्यामुळे सध्या तरी दरवाढीचा निर्णय जाहीर झालेला नाही.
दर कुठे राहिले स्थिर
इंडियन ऑइल कॉर्पोरेशननेही 1 मे रोजी दिलेल्या माहितीनुसार पेट्रोल आणि डिझेलच्या किमतीत कोणताही बदल करण्यात आलेला नाही. दिल्ली, मुंबई, कोलकाता आणि चेन्नईसारख्या प्रमुख शहरांमध्ये दर स्थिर ठेवण्यात आले आहेत. तथापि, कच्च्या तेलाचे वाढते दर, जागतिक तणाव आणि पुरवठा साखळीवरील परिणाम लक्षात घेता आगामी काळात इंधन दरवाढीची शक्यता नाकारता येत नाही. त्यामुळे सर्वसामान्यांच्या खिशावर आणखी ताण येण्याची भीती व्यक्त होत आहे.
