'ऑपरेशन सिंदूर' क्षेपणास्त्र हल्ल्यानंतर पाकिस्तानने आपल्या सशस्त्र दलांना 'प्रत्युत्तर कारवाई' करण्याची अधिकृत परवानगी दिली आहे.
इस्लामाबाद- भारताने पाकिस्तान आणि पाकव्याप्त काश्मीरमधील दहशतवादी तळांवर केलेल्या क्षेपणास्त्र हल्ल्यानंतर पाकिस्तानने आपल्या सशस्त्र दलांना 'प्रत्युत्तर कारवाई' करण्याची अधिकृत परवानगी दिली आहे. गेल्या महिन्यात जम्मू-काश्मीरमधील पहलगाम येथे झालेल्या दहशतवादी हल्ल्याचा बदला म्हणून भारताने बुधवारी पहाटे 'ऑपरेशन सिंदूर' सुरू केल्यानंतर पाकिस्तानकडून ही घोषणा करण्यात आली आहे.
“संयुक्त राष्ट्रांच्या सनदेच्या कलम ५१ नुसार, निर्दोष पाकिस्तानी नागरिकांच्या जीवितहानीचा आणि आपल्या सार्वभौमत्वाच्या उघड उल्लंघनाचा बदला घेण्यासाठी, पाकिस्तानला स्वसंरक्षणार्थ योग्य वेळी, ठिकाणी आणि पद्धतीने प्रत्युत्तर देण्याचा अधिकार आहे,” असे राष्ट्रीय सुरक्षा परिषदेच्या निवेदनात म्हटले आहे.
“यासंदर्भात पाकिस्तानच्या सशस्त्र दलांना संबंधित कारवाई करण्याचे अधिकार देण्यात आले आहेत,” असे निवेदनात पुढे म्हटले आहे.
Related Articles
आज सकाळी पंतप्रधान शाहबाझ शरीफ यांनी केंद्रीय मंत्री, मुख्यमंत्री, सेनाप्रमुख आणि वरिष्ठ लष्करी अधिकाऱ्यांसह उच्चस्तरीय सुरक्षा बैठकीचे अध्यक्षपद भूषवले. भारताच्या क्षेपणास्त्र हल्ल्यामुळे निर्माण झालेल्या परिस्थिती आणि त्याच्या संभाव्य परिणामांवर राष्ट्रीय सुरक्षा परिषदेने चर्चा केली. पंतप्रधान शरीफ यांनी घडामोडींचा आढावा घेण्यासाठी दुपारी ३:३० वाजता कॅबिनेट बैठक बोलावली आहे. पाकिस्तानच्या प्रत्युत्तराबाबतचे निर्णय जाहीर करण्यासाठी पंतप्रधान संसदेत राष्ट्राला संबोधित करतील अशी अपेक्षा आहे.
२२ एप्रिल रोजी जम्मू-काश्मीरमधील पहलगाम येथे झालेल्या दहशतवादी हल्ल्याचा बदला म्हणून भारताने 'ऑपरेशन सिंदूर' अंतर्गत क्षेपणास्त्र हल्ले केले. या हल्ल्यात २६ जणांचा मृत्यू झाला होता. या कारवाईअंतर्गत भारताने पाकिस्तानातील प्रमुख दहशतवादी तळांना लक्ष्य केले, ज्यामुळे दोन्ही देशांमधील संघर्षात लक्षणीय वाढ झाली आहे.
