जम्मू-काश्मीरच्या सोनमर्गमध्ये सोशल मीडियासाठी व्हिडिओ बनवताना एक महिंद्रा स्कॉर्पिओ सिंधू नदीच्या जोरदार प्रवाहात अडकली. पोलिसांनी आणि स्थानिकांनी गाडीतील लोकांना सुखरूप बाहेर काढलं.
सोशल मीडियावर लाईक्स आणि कमेंट्ससाठी तरुण-तरुणी काय करतील याचा काही नेम नाही. असाच एक धक्कादायक प्रकार जम्मू-काश्मीरच्या सोनमर्गमध्ये घडला आहे. इथे काही तरुणांनी सोशल मीडियासाठी रील बनवण्याच्या नादात आपली महिंद्रा स्कॉर्पिओ थेट वेगाने वाहणाऱ्या सिंधू नदीत घातली. पण हा स्टंट त्यांच्या अंगाशी आला आणि गाडी नदीच्या जोरदार प्रवाहात अडकली.
ही घटना सोनमर्गमधील हॉटेल सिंध रिसॉर्टजवळ घडली. मिळालेल्या माहितीनुसार, ड्रायव्हरने कॅमेऱ्यासाठी स्टंट करताना गाडी थेट नदीच्या पात्रातच उतरवली. पण पाण्याचा प्रवाह इतका जोरदार होता की, गाडी पुढे जाऊ शकली नाही आणि तिथेच अडकून पडली. गाडीतील प्रवासी नदीच्या मधोमध अडकले आणि गाडी वाहून जाण्याचा धोका निर्माण झाला.
या घटनेची माहिती मिळताच जम्मू-काश्मीर पोलीस तातडीने घटनास्थळी दाखल झाले. स्थानिक नागरिकांनीही मदतीसाठी धाव घेतली. पोलीस आणि स्थानिकांच्या मदतीने गाडीतील सर्व लोकांना सुखरूप बाहेर काढून नदीच्या काठावर आणण्यात आले.
नंतर स्कॉर्पिओ गाडीलाही नदीतून बाहेर काढण्यात आले. सुदैवाने या घटनेत कोणालाही इजा झाली नाही. पोलिसांनी दिलेल्या माहितीनुसार, गाडी चालवणाऱ्या ड्रायव्हरचे नाव मोहम्मद इबाद भट असून तो श्रीनगरच्या नवाकदलचा रहिवासी आहे. गाडीतील दुसऱ्या व्यक्तीचे नाव नसीर अहमद मुगल असून तो रियासी जिल्ह्यातील माहोरचा रहिवासी आहे. पोलिसांनी सांगितले की, व्हिडिओ बनवण्यासाठी गाडी नदीत घालणे हा गंभीर निष्काळजीपणा आहे. यामुळे गाडीतील लोकांच्या आणि इतरांच्या जीवाला धोका निर्माण झाला होता. या प्रकरणी पोलिसांनी गुन्हा दाखल केला आहे.
व्हायरल व्हिडिओ पाहा
या घटनेनंतर प्रशासनाने पर्यटक आणि स्थानिक तरुणांना डोंगराळ भागातील नद्या आणि जलाशयांजवळ असे धोकादायक स्टंट न करण्याचे आवाहन केले आहे. अशा प्रकारच्या कृत्यांमुळे जीव जाऊ शकतो आणि कठोर कायदेशीर कारवाईला सामोरे जावे लागेल, असा इशाराही पोलिसांनी दिला आहे.
