इंटेलचा कर्मचाऱ्यांना मोफत कॉफी, चहा

आयटी कंपन्यांसह अनेक कंपन्यांमध्ये नोकरी कपाती सध्या सामान्य झाल्या आहेत. कोरोनानंतर खर्च व्यवस्थापन, तोटा यासारख्या अनेक कारणांमुळे नोकरी कपाती झाल्या आहेत. अलीकडेच लोकप्रिय टेक कंपनी इंटेलने तब्बल १५,००० कर्मचाऱ्यांना काढून टाकले होते. गेल्या वर्षापासून इंटेल व्यवस्थापन खर्च कमी करत असताना मोठी नोकरी कपात केली होती. परंतु या नोकरी कपातीचा उर्वरित कर्मचाऱ्यांवर परिणाम झाला होता. नोकरीत असुरक्षितता जाणवू लागली होती. आता इंटेल कर्मचाऱ्यांचा आत्मविश्वास वाढवण्यासाठी कार्यालयात कर्मचाऱ्यांना कॉफी, चहा मोफत देण्याचा निर्णय घेतला आहे.

बहुराष्ट्रीय कंपनी असूनही इंटेल कंपनीत कर्मचाऱ्यांना कॉफी, चहा मोफत नव्हता. कॉफी किंवा चहा हवा असल्यास पैसे देऊन घ्यावा लागत होता. आता नोकरी कपातीनंतर घडलेल्या घटनांमुळे इंटेलने धडा घेतला असून, मोफत कॉफी, चहाची घोषणा केली आहे. 

२०२३ मध्ये इंटेल कार्यालयात वाढलेला खर्च कमी करण्यासाठी कठोर निर्णय घेतले होते. वार्षिक खर्च कमी करण्यासाठी कॉफी, चहा मोफत देण्याच्या प्रक्रियेला ब्रेक दिला होता. यासोबतच इतर काही सुविधाही इंटेलने कमी केल्या होत्या. आता नोकरी कपातीनंतर इंटेलने पुन्हा कॉफी, चहाची मोफत सेवा सुरू केली आहे.

कार्यालयातील खर्च कमी करण्यासाठी कंपनीने काही निर्णय घेतले आहेत. यासोबतच बंद केलेली मोफत कॉफी, चहाची व्यवस्था पुन्हा सुरू करण्यात आली आहे. यामुळे कार्यालय संस्कृती आणि कर्मचाऱ्यांचा आत्मविश्वास वाढण्यास हा छोटासा बदल मदत करेल असे कंपनीने म्हटले आहे. नोकरी कपात यासारख्या अनेक निर्णयांनंतरही इंटेलला व्यवस्थापन खर्चाचे आव्हान आहे. परंतु हा बदल अपरिहार्य होता असे कंपनीने म्हटले आहे. 

इंटेल टप्प्याटप्प्याने नोकरी कपात करत आली आहे. २०२३ ते २०२४ च्या ऑगस्ट महिन्यापर्यंत १५,००० कर्मचाऱ्यांची कपात केली आहे. आता अमेरिकेत पुन्हा २००० नोकऱ्या कमी करण्याच्या तयारीत आहे. गेल्या वर्षापासून कंपनी अनेक गंभीर आव्हानांना सामोरे जात आहे. त्यामुळे अनेक कपाती केल्या आहेत. सध्या बंद केलेला कॉफी, चहा मात्र पुन्हा सुरू करण्यात आला आहे. परंतु कर्मचाऱ्यांना देण्यात येणारी परतफेड सुविधा, इंटरनल बिल, फोन बिल, प्रवास खर्च यासारख्या अनेक भत्त्यांमध्ये कपात करण्यात आली आहे.