Viral Video : अमेरिकेतील एक धक्कादायक व्हिडिओ सोशल मीडियावर व्हायरल झाला आहे. यात एक भारतीय जोडपं वर्णद्वेषी हल्ल्याला सामोरं जात असल्याचं दिसतंय. एका अनोळखी व्यक्तीने त्यांना 'भारतात परत जा' असं म्हटल्याचा आरोप आहे.
Viral Video : अमेरिकेतील (United States) एक धक्कादायक व्हिडिओ सोशल मीडियावर व्हायरल (viral) झाला आहे. यात एका भारतीय जोडप्यासोबत वर्णद्वेषी गैरवर्तन झाल्याचं दिसतंय. एका अनोळखी व्यक्तीने त्यांना 'भारतात परत जा' (go back to India) असं म्हटल्याचा आरोप आहे. ही घटना नेमकी कुठली आणि कधीची आहे, हे अद्याप स्पष्ट झालेलं नाही. पण या व्हिडिओमुळे अमेरिकेत राहणाऱ्या भारतीय आणि अनिवासी भारतीयांमध्ये (NRIs) संतापाची लाट उसळली आहे. अनेकांच्या मते, अमेरिकेच्या काही भागांमध्ये अशा घटना आता वाढू लागल्या आहेत.
या व्हिडिओमध्ये एक व्यक्ती आपल्या कारमध्ये बसून या भारतीय जोडप्याशी बोलताना दिसतोय. सुरुवातीला तो त्यांना विचारतो की ते भारतीय आहेत का. त्यानंतर तो 'भारत चांगला की अमेरिका?' असा विचित्र प्रश्न विचारतो.
या विचित्र परिस्थितीतही ते जोडपं शांतपणे आणि नम्रपणे उत्तरं देत राहतं. जेव्हा त्या व्यक्तीने सांगितलं की त्याचं कुटुंब भारतात राहतं, तेव्हा तो अनोळखी माणूस आक्रमक झाला. तो म्हणाला, 'जर भारत इतका चांगला आहे, तर तुम्ही अमेरिकेत का राहता?'
Related Articles
यावर त्या भारतीय व्यक्तीने शांतपणे उत्तर दिलं, 'जग पाहण्यासाठी आलो आहोत.'
हे ऐकून तो माणूस आणखीनच भडकला आणि म्हणाला, 'नाही, आम्हाला तुम्ही इथे नको आहात. तुम्ही तुमच्या घरी परत जा.' त्यानंतर त्याने 'Get the f*uk out of my country' (माझ्या देशातून चालते व्हा) अशी शिवीगाळ केली. पण यावरही त्या भारतीय व्यक्तीने कोणतीही प्रतिक्रिया दिली नाही.
हा व्हिडिओ सोशल मीडियावर वेगाने पसरला आणि अनेक NRI चॅनेल्स व भारतीय वंशाच्या युझर्सनी या द्वेषपूर्ण वागणुकीचा निषेध केला आहे.
या वर्णद्वेषी हल्ल्याला सामोरं जातानाही शांत राहिल्याबद्दल नेटकऱ्यांनी त्या जोडप्याचं कौतुक केलं आहे. पण त्याचवेळी, अनेकांनी असंही म्हटलं आहे की अशा गप्प बसण्यामुळेच हल्लेखोरांना आणखी बळ मिळतं.
एका युझरने लिहिले, 'नॉर्थ टेक्सासमध्ये अशा घटना खऱ्या आयुष्यात वाढत आहेत. तुमच्यासोबत किंवा तुमच्या ओळखीच्या कोणासोबत असं घडल्यास, पोलिसांना नक्की कळवा. तुमच्या बाजूने घटनेचं रेकॉर्डिंग करा आणि पोलिसांना द्या. काहीच न केल्याने अशा गुंडांना प्रोत्साहन मिळतं!!'
या वादामुळे सोशल मीडियावर केवळ प्रसिद्धी आणि एंगेजमेंटसाठी भारतविरोधी व्हिडिओ बनवणाऱ्या इन्फ्लुएन्सर्सचा मुद्दाही चर्चेत आला आहे. ज्या @AyTone4th नावाच्या व्हेरिफाइड हँडलवरून हा व्हिडिओ पोस्ट झाला आहे, तो स्वतःला म्युझिक प्रोड्युसर म्हणवतो.
याच व्यक्तीने याआधीही एक वादग्रस्त व्हिडिओ पोस्ट केला होता. त्यात तो एका भारतीय रेस्टॉरंटमध्ये जाऊन 'गाईचं शेण' (cow poo) मिळेल का, अशी खिल्ली उडवताना दिसला होता, ज्यामुळे मोठा वाद निर्माण झाला होता.
