एक ४६ वर्षीय झेप्टो डिलिव्हरी बॉय हैदराबादमध्ये मुसळधार पावसात आपल्या बाईकसह उघड्या नाल्यात पडला. पोलीस आणि 'हायड्रा' (HYDRAA) टीमने तातडीने रेस्क्यू ऑपरेशन राबवत त्याला पुराच्या पाण्यातून सुखरूप बाहेर काढले.
हैदराबाद : हैदराबादच्या माधापूरमधील विठ्ठल राव नगर भागात मुसळधार पावसात एक मोठी दुर्घटना टळली. झेप्टो (Zepto) या ग्रोसरी ॲपसाठी काम करणारा एक डिलिव्हरी बॉय बाईकसह उघड्या नाल्यात पडला. पोलीस आणि हैदराबाद डिझास्टर रिस्पॉन्स अँड ॲसेट प्रोटेक्शन एजन्सी (HYDRAA) च्या टीमने त्याला नाल्यातून सुखरूप बाहेर काढले. या थरारक रेस्क्यू ऑपरेशनचा व्हिडीओ सध्या सोशल मीडियावर तुफान व्हायरल होत आहे.
या डिलिव्हरी बॉयचे नाव घंटासाला अर्जुन कुमार (वय ४६) आहे. नाल्यातून पावसाचे पाणी अतिशय वेगाने वाहत होते. याच दरम्यान अर्जुनचा बाईकवरील ताबा सुटला आणि तो थेट उघड्या नाल्यात पडला. पाण्याचा प्रवाह इतका वेगवान होता की तो बाईकसह वाहून जाऊ लागला. सुदैवाने, तातडीने बचावकार्य सुरू करण्यात आले.
पोलीस आणि 'हायड्रा'ची टीम घटनेची माहिती मिळताच लगेच घटनास्थळी पोहोचली. अधिकाऱ्यांनी जीवाची पर्वा न करता वेगाने वाहणाऱ्या पाण्यात उडी घेतली आणि अर्जुनला सुखरूप बाहेर काढले. तो आता पूर्णपणे सुरक्षित आहे.
या थरारक बचावकार्याचा व्हिडीओ सध्या इंटरनेटवर व्हायरल झाला आहे. रेस्क्यू टीमचे जवान या व्हिडीओमध्ये पावसाच्या पाण्यातून वाट काढत अर्जुनला वाचवताना दिसत आहेत. रस्त्याच्या कडेला उभ्या असलेल्या लोकांच्या मदतीने त्याला सुखरूप बाहेर खेचण्यात आले.
पाहा व्हायरल व्हिडीओ
'अर्णब' चक्रीवादळामुळे (Cyclone Arnab) तेलंगणासह मध्य आणि पूर्व भारताच्या काही भागात हवामानात मोठे बदल झाले आहेत. तेलंगणामध्ये मुसळधार पावसाचा इशारा देण्यात आला असून, अनेक ठिकाणी पाणी साचले आहे.
या घटनेमुळे मुसळधार पावसात उघडे नाले आणि निसरड्या रस्त्यांमुळे होणाऱ्या धोक्यांचा मुद्दा पुन्हा एकदा चर्चेत आला आहे. अर्जुन आता सुखरूप असून, या घटनेची अधिक माहिती घेतली जात आहे.
