)
)
)
सार
मुले आणि कुटुंब झाल्यावर बहुतेक महिला इतर गोष्टींपासून दूर राहून घरातील कामांवर लक्ष केंद्रित करतात. काही जणी त्यांच्या आवडी कुटुंबासाठी बाजूला ठेवतात. पण आयुष्यात कितीही बदल झाले तरी महिलांनी घरातच राहिले पाहिजे असे नाही हे सिद्ध करत आहेत नाजी नौशी या गृहिणी. केरळच्या नाजी नौशी यांना प्रवास करायला आवडते. नाजी यांचा एकटीचा साहसी प्रवास सध्या सोशल मीडियावर व्हायरल होत आहे.
नाजी नौशी या पाच मुलांच्या आई आहेत. त्यांना त्यांच्या आवडीनुसार जगभर फिरण्याची इच्छा आहे. त्यांच्या महिंद्रा थारमधील एकट्या प्रवासाचे फोटो आणि अनुभव त्यांनी इंस्टाग्रामवर शेअर केले आहेत, ज्यामुळे त्यांना अनेक चाहते मिळाले आहेत. पुरुषांप्रमाणेच महिलाही असे प्रवास करू शकतात हे नाजी दाखवून देत आहेत.
प्रवासादरम्यान कोणतीही अडचण येऊ नये म्हणून नाजी यांनी त्यांच्या गाडीत सुरक्षा साधने, अन्न आणि स्वयंपाक करण्याची व्यवस्था केली आहे. सध्या कुवेतमध्ये राहणाऱ्या नाजी बहारीन, ओमान, कतार, सौदी अरेबियामधून संयुक्त अरब अमिरातीमध्ये प्रवास करण्याच्या तयारीत आहेत.
दरम्यान, एकटीचा प्रवास दिसतो तितका सोपा नाही, असे नाजी म्हणतात. एकदा प्रवासादरम्यान त्यांची गाडी वाळवंटात बिघडली होती आणि एका तरुणाने त्यांना मदत केली, असे त्यांनी इंस्टाग्रामवर शेअर केलेल्या व्हिडिओमध्ये म्हटले आहे. फिफा विश्वचषकात त्यांच्या आवडत्या संघाचा सामना पाहण्यासाठी त्यांनी कतारला केलेल्या प्रवासाने त्यांना प्रसिद्धी मिळवून दिली. प्रवासप्रेमी असलेल्या नाजी यांनी लक्षद्वीप आणि नेपाळमध्येही एकट्याने प्रवास केला आहे.