गुजरातमधील जैन समाजाने JITO संस्थेमार्फत एकत्र येऊन १८६ लक्झरी कार्सची खरेदी केली आहे, ज्याची एकूण किंमत ₹१४९.५४ कोटी होती. या मोठ्या समूह खरेदीमुळे त्यांना तब्बल ₹२१.२२ कोटींची सूट मिळाली.
गुजरातमधल्या जैन समाजाने अलीकडेच एक अशी खरेदी केली आहे, ज्याने सगळ्या जगाचे लक्ष वेधून घेतले आहे. Jain International Trade Organisation (JITO) या संस्थेच्या माध्यमातून जैन समाजाने एकाच वेळी तब्बल १८६ लक्झरी कार्स विकत घेतल्या. ही खरेदी साधी नव्हती, या सर्व कार्सची एकूण किंमत ₹१४९.५४ कोटी इतकी होती. एवढी मोठी खरेदी एकाच समाजाने, एकत्रितपणे केली, ही भारतात दुर्मिळ गोष्ट मानली जाते.
त्यांनी मिळवली २१ कोटींची सूट
या खरेदीतील सर्वात खास गोष्ट म्हणजे त्यांनी घेतलेली मोठी सूट. JITO ने विक्रेत्यांशी चर्चा करून संपूर्ण व्यवहारावर तब्बल ₹२१.२२ कोटींची सूट मिळवली. म्हणजेच त्यांनी कार्स कमी किमतीत विकत घेतल्या. या कार्समध्ये Audi, BMW, Mercedes-Benz यांसारख्या प्रसिद्ध आणि महागड्या ब्रँड्सचा समावेश होता. एका कारची किंमत साधारण ₹६० लाख ते ₹१.३४ कोटी इतकी होती.
या प्रकल्पात गुजरातसह भारतातील इतर राज्यांमधील अनेक जैन लोक सहभागी झाले होते. मात्र, या मोठ्या खरेदीत अहमदाबादमधील जैन समुदायाचा सहभाग सर्वाधिक होता. JITO ही संस्था भारतभर सक्रिय असून तिचे सुमारे ६५,००० सदस्य आहेत. ही खरेदी ‘समूह खरेदी’च्या कल्पनेवर आधारित होती, म्हणजे जेव्हा अनेक लोक एकत्र येऊन एकाच वेळी खूप मोठ्या प्रमाणात खरेदी करतात, तेव्हा विक्रेत्यांकडून मोठी सूट मिळू शकते.
Related Articles
मोठ्या खरेदीत राबवणार ही योजना
JITO आता फक्त कारपुरतीच मर्यादित राहणार नाही. या संस्थेने जाहीर केले आहे की भविष्यात ते इलेक्ट्रॉनिक्स, औषधे, दागिने आणि इतर वस्तू यांसाठीही अशीच समूह खरेदी करण्याची योजना आखत आहेत. त्यामुळे समाजातील लोकांना दर्जेदार वस्तू कमी किमतीत मिळतील आणि एकमेकांमधील आर्थिक सहकार्यही वाढेल.
जैन समाजाबरोबरच गुजरातमधील मारवाड समाजानेही असाच एक उपक्रम राबवला. त्यांनी एकत्र येऊन १२१ JCB मशीन खरेदी केली आणि त्यांनाही प्रत्येकी सुमारे ₹३.३ लाखांची सूट मिळाली. अशा प्रकारच्या समूह खरेदीतून हे दिसते की जर लोक एकत्र आले, विचारपूर्वक निर्णय घेतला, आणि सामूहिक शक्तीचा वापर केला, तर मोठ्या प्रमाणात पैशांची बचत आणि समाजाची प्रगती दोन्ही साधता येऊ शकतात.
