Financial News: किती कर्ज आहे तुमच्या डोक्यावर? शोध घ्या पॅन कार्डच्या मदतीने
Financial News: हल्ली अनेकदा EMI सुविधा वापरून विविध प्रकारच्या वस्तू कर्जावर खरेदी केल्या जातात. ही कर्जं पॅनशी जोडलेली असतात आणि हे तुम्ही सहजपणे जाणून घेऊ शकता. यामुळे तुमचा कर्जाचा इतिहास स्पष्ट दिसतो आणि बनावट कर्ज वेळीच ओळखायला मदत होते.
पॅन कर्ज तपासणी
आजकाल अनेक लोकांना त्यांच्या पॅन नंबरशी किती कर्जं जोडलेली आहेत, हे स्पष्टपणे माहीत नसतं. कधीतरी घेतलेलं कर्ज विसरलं जाऊ शकतं. काहीवेळा तुमच्या नावावर कोणीतरी परस्पर कर्ज घेतलेलं असू शकतं. अशा परिस्थितीमुळे भविष्यात आर्थिक समस्या निर्माण होऊ शकतात. त्यामुळे तुमच्या पॅनशी संबंधित कर्जाचे तपशील तपासणं ही एक सुरक्षित सवय आहे.
पॅनवरील कर्जाचा तपशील
यासाठी क्रेडिट रिपोर्ट हे एक महत्त्वाचं साधन आहे. हा तुमच्या आर्थिक सवयींचा संपूर्ण रेकॉर्ड असतो. यामध्ये तुम्ही घेतलेली सक्रिय कर्जं, पूर्ण झालेली कर्जं, कोणत्या कंपनीने कर्ज दिलं, किती थकबाकी आहे, हप्ता वेळेवर भरला जातो की नाही, अशी माहिती असते. बँका आणि वित्तीय संस्था हे तपशील क्रेडिट ब्युरोकडे पाठवतात, त्यामुळे तुमचा क्रेडिट इतिहास एकाच ठिकाणी नोंदवला जातो.
क्रेडिट रिपोर्ट कसा पाहावा
हा रिपोर्ट मिळवणं सोपं आहे. अधिकृत क्रेडिट ब्युरोच्या वेबसाइट किंवा ॲपद्वारे नोंदणी करून तुम्ही तो पाहू शकता. साधारणपणे पॅन नंबर, नाव, जन्मतारीख, मोबाईल नंबर यांसारख्या तपशिलांची OTP द्वारे पडताळणी करावी लागते. लॉग इन केल्यानंतर तुम्ही तुमचा क्रेडिट रिपोर्ट पाहून सर्व कर्जाचे तपशील जाणून घेऊ शकता. अनेक फायनान्शियल सर्व्हिस ॲप्स देखील हीच माहिती देतात.
कर्जाचा इतिहास
रिपोर्ट पाहताना तुम्हाला माहीत नसलेलं कोणतंही कर्ज दिसल्यास, त्वरित कारवाई करावी. संबंधित कंपनीशी संपर्क साधा आणि गरज भासल्यास तक्रार दाखल करा. वर्षातून किमान एकदा तरी क्रेडिट रिपोर्ट तपासणं चांगलं आहे. विशेषतः नवीन कर्ज घेण्यापूर्वी नक्की पाहावं. असं केल्याने तुमची आर्थिक स्थिती स्पष्ट दिसेल आणि चुकीची किंवा बनावट कर्जं वेळीच ओळखता येतील.
