केंद्रीय गृहमंत्री अमित शाह यांनी अलवरमध्ये शेतकऱ्यांसाठी DBT आणि ११,००० कोटी रुपयांपेक्षा जास्त किमतीच्या विकास प्रकल्पांची घोषणा केली. त्यांनी पंतप्रधान मोदींच्या 'GYAN' व्हिजनची ओळख करून दिली, १०,५८० तरुणांना नोकरीची पत्रं दिली आणि अलवर मेडिकल कॉलेजला ए.बी. वाजपेयी यांचं नाव दिलं.
केंद्रीय गृहमंत्री अमित शाह यांनी रविवारी राजस्थानमध्ये 'पीएम किसान सन्मान निधी' आणि 'पीक विमा योजने'साठी डायरेक्ट बेनिफिट ट्रान्सफर (DBT) कार्यक्रमाची सुरुवात केली. यावेळी त्यांनी सांगितलं की, पंतप्रधान नरेंद्र मोदी यांच्या नेतृत्वाखालील सरकार २०४७ पर्यंत भारताला विकसित राष्ट्र बनवण्यासाठी 'GYAN' (ज्ञान) या व्हिजनवर काम करत आहे.
अलवरमधील एका जाहीर सभेला संबोधित करताना, केंद्रीय गृहमंत्र्यांनी १०,५८० तरुणांना सरकारी नोकरीची नियुक्तीपत्रंही दिली. सोबतच, त्यांनी ६,२६० कोटी रुपयांपेक्षा जास्त किमतीच्या विकास प्रकल्पांची पायाभरणी केली.
"एकाच निश्चयाने पंतप्रधान मोदी 'GYAN' हे व्हिजन पूर्ण करत आहेत. त्यांनी 'GYAN'ची व्याख्या सांगितली आहे - 'G' म्हणजे गरीब, 'Y' म्हणजे युवा, 'A' म्हणजे अन्नदाता (शेतकरी) आणि 'N' म्हणजे नारी (महिला). जर आपल्याला २०४७ पर्यंत भारताला पूर्णपणे विकसित राष्ट्र बनवायचं असेल, तर याच गटांना सक्षम करणं गरजेचं आहे," असं अमित शाह म्हणाले.
'GYAN' स्तंभांप्रति सरकारची वचनबद्धता
या चार स्तंभांप्रति सरकारची वचनबद्धता अधोरेखित करताना शाह पुढे म्हणाले, "याच वचनबद्धतेमुळे, भाजप सरकारने आज शेतकऱ्यांसाठी 'किसान सन्मान निधी' दिला आहे, पशुपालकांसाठी ५०० कोटी रुपयांचा डेअरी उपक्रम, तरुणांसाठी रोजगाराच्या संधी आणि आमच्या माता-भगिनींसाठी 'सरस डेअरी'चा विस्तार केला आहे."
या कार्यक्रमादरम्यान राजस्थान सरकारने सुरू केलेल्या विकासकामांची माहितीही गृहमंत्र्यांनी दिली. ते म्हणाले, "पीएम किसान सन्मान निधी आणि पीक विमा योजनेअंतर्गत शेतकऱ्यांना DBT द्वारे पैसे, १०,५८० तरुणांना सरकारी नोकरीची नियुक्तीपत्रं आणि राजस्थान सरकारद्वारे ६,२६२ कोटी रुपयांच्या विकासकामांचं उद्घाटन आणि पायाभरणी आज झाली आहे."
अलवर मेडिकल कॉलेजला ए.बी. वाजपेयी यांचं नाव
याच कार्यक्रमात अमित शाह यांनी अलवर मेडिकल कॉलेजला माजी पंतप्रधान अटलबिहारी वाजपेयी यांचं नाव देण्याची घोषणा केली आणि त्यांना आदरांजली वाहिली. "आज अलवर मेडिकल कॉलेजला अटलबिहारी वाजपेयी यांचं नाव दिलं जात आहे. 'प्रधानमंत्री ग्राम सडक योजने'मुळे देशातील प्रत्येक गाव अटलजींना नेहमी लक्षात ठेवेल. उत्तम प्रशासनासाठी संपूर्ण देश त्यांना ओळखेल आणि पोखरणमधील अणुचाचणीमुळे भारताला अणुशक्ती बनवल्याबद्दल संपूर्ण देशासोबतच राजस्थानची जनताही त्यांना कायम स्मरणात ठेवेल," असं शाह म्हणाले.
ते पुढे म्हणाले, "आज या व्यासपीठावरून, मी संपूर्ण देशाच्या आणि अलवरच्या लोकांच्या वतीने आदरणीय अटलजींना भावपूर्ण श्रद्धांजली अर्पण करतो."
डेअरी आणि सहकार क्षेत्राला चालना
राज्यातील डेअरी आणि सहकारी बँकिंग क्षेत्राचा विस्तार करताना, केंद्रीय गृहमंत्र्यांनी शेतकऱ्यांना सक्षम करण्यासाठी अनेक सुविधा सुरू करण्याची घोषणा केली. "आज अलवर व्यतिरिक्त भिलवाडा, जयपूर, पाली आणि राजसमंदमध्ये २७४ कोटी रुपयांचे आणखी ४ 'सरस डेअरी' प्लांट सुरू होत आहेत. त्याचबरोबर फलोदी, बालोत्रा, डिडवाना आणि प्रतापगडमध्ये चार जिल्हास्तरीय बँकांचे उद्घाटन होत आहे. या बँका शेतकऱ्यांना शून्य टक्के व्याजाने कर्ज देतील," असं अमित शाह यांनी सांगितलं.
११,००० कोटींहून अधिकची विकासकामं
एकाच दिवसातील विकासकामांचा आवाका सांगताना शाह म्हणाले की, चित्तोडगड आणि अलवरमध्ये सुरू झालेल्या प्रकल्पांची एकूण किंमत ११,००० कोटी रुपयांपेक्षा जास्त आहे. "आज मुख्यमंत्र्यांच्या योजनेअंतर्गत DBT द्वारे १५२ कोटी रुपये हस्तांतरित करण्यात आले आहेत. याशिवाय, ६,४५३ कोटी रुपयांच्या एकूण ९५४ प्रकल्पांची पायाभरणी आणि भूमिपूजन झालं आहे. आज सकाळीच मी चित्तोडगडमध्ये ५,५०० कोटी रुपयांच्या प्रकल्पांचे उद्घाटन केलं आणि इथे ६,४५३ कोटी रुपयांचे प्रकल्प सुरू झाले. म्हणजे एकाच दिवसात एकूण ११,९५३ कोटी रुपयांच्या कामांची पायाभरणी झाली आहे. यालाच 'डबल-इंजिन' सरकार म्हणतात," असं ते म्हणाले.
अमित शाह यांचा काँग्रेसवर हल्लाबोल
राज्यातील राजकीय परिस्थितीवर बोलताना गृहमंत्र्यांनी काँग्रेस पक्षावर जोरदार टीका केली. ते म्हणाले की, काँग्रेसचे नेते अंतर्गत सत्तासंघर्षातच व्यस्त आहेत, तर राजस्थानच्या जनतेने आपला कौल आधीच दिला आहे. "काँग्रेसमध्ये आजही गेहलोत (अशोक गेहलोत) आणि त्यांचे प्रदेशाध्यक्ष किंवा विरोधी पक्षनेते एकमेकांशी भांडण्यातच व्यस्त आहेत. मी आज हे सांगतो की, राजस्थानच्या जनतेने भाजपला निवडून देण्याचा निर्णय घेतला आहे. काँग्रेसचा पूर्णपणे सुपडा साफ झाला आहे," असं शाह म्हणाले.
मुख्यमंत्री शर्मा यांनी केलं विकासकामांचं कौतुक
राजस्थानचे मुख्यमंत्री भजनलाल शर्मा यांनी रविवारी केंद्रीय गृह आणि सहकार मंत्री अमित शाह यांचे कौतुक केले. ते म्हणाले की, ५,६५९ कोटी रुपयांपेक्षा जास्त किमतीच्या विकास प्रकल्पांच्या उद्घाटन आणि पायाभरणीमुळे राज्याच्या प्रगतीला "नवी गती" मिळेल.
यावेळी बोलताना मुख्यमंत्री शर्मा यांनी सांगितलं की, हे उपक्रम राजस्थानच्या सर्वांगीण विकासाच्या दिशेने एक महत्त्वाचं पाऊल आहे. "केंद्रीय गृह आणि सहकार मंत्री अमित शाह यांनी ५,६५९ कोटी रुपयांपेक्षा जास्त खर्चाच्या विविध विकास प्रकल्पांचे उद्घाटन आणि पायाभरणी करून राज्याच्या सर्वांगीण विकासाला नवी गती दिली आहे. या प्रकल्पांमुळे राजस्थानच्या विकासाला नवी दिशा आणि गती मिळेल," असं ते म्हणाले.
