सुरक्षेच्या कारणास्तव एअर इंडिया आणि एअर इंडिया एक्सप्रेसने सौदी अरेबियाला जाणारी आपली विमानसेवा तात्पुरती थांबवली आहे. येमेनमधील हुती बंडखोरांच्या हल्ल्यांमुळे हा तातडीचा निर्णय घेण्यात आला आहे. आधीच तिकीट बुक केलेल्या प्रवाशांना रिफंड किंवा तिकीट रिशेड्युल करण्याचा पर्याय देण्यात आला आहे.
नवी दिल्ली: सध्याच्या सुरक्षेच्या धोक्यांमुळे एअर इंडिया आणि एअर इंडिया एक्सप्रेसने सौदी अरेबियातील प्रमुख शहरांकडे जाणारी आपली विमानसेवा स्थगित करण्याचा निर्णय वाढवला आहे. नव्या सूचनेनुसार, रियाध आणि दम्मामला जाणारी उड्डाणे ३० नोव्हेंबरपर्यंत रद्द करण्यात आली आहेत. याशिवाय, जेद्दाहसाठी असलेली विमानसेवा २१ नोव्हेंबरपर्यंत थांबवण्यात आली आहे. प्रवासी आणि कर्मचाऱ्यांच्या सुरक्षेचा विचार करून विमान कंपन्यांनी हे तातडीचे पाऊल उचलले आहे. उड्डाणे रद्द झाल्यामुळे प्रवाशांनी त्यांच्या प्रवासाचे तपशील तपासून पाहणे गरजेचे आहे.
या भागात सतत सुरू असलेल्या तणावामुळे विमान उड्डाणांमध्ये सातत्याने व्यत्यय येत आहे, म्हणूनच हा निर्णय घेण्यात आला आहे. इंडिगोनेही १० नोव्हेंबरला जेद्दाह आणि मदिना येथील आपली उड्डाणे २१ नोव्हेंबरपर्यंत थांबवली होती. आकासा एअरने नुकतेच रियाध आणि जेद्दाहची सर्व उड्डाणे ३० नोव्हेंबरपर्यंत स्थगित केल्याचे जाहीर केले होते. विमानसेवा बंद असलेल्या काळासाठी, ज्या प्रवाशांनी १० नोव्हेंबर किंवा त्यापूर्वी तिकीट बुक केले आहे, त्यांना तिकीट रिशेड्युल करण्याचा किंवा रिफंड मिळवण्याचा पर्याय एअर इंडिया आणि एअर इंडिया एक्सप्रेसने दिला आहे. सौदी अरेबियामध्ये अनेक ठिकाणी येमेनमधील हुती बंडखोरांनी हल्ले तीव्र केले आहेत. याच पार्श्वभूमीवर विमान कंपन्यांनी हा मोठा निर्णय घेतला आहे.
